Pakistan Women

काठमाडौँ। नेपाल भलिबल संघको आयोजनामा हरने सेन्ट्रल एसियन भलिबल एसोसिएसन ९काभा० वुमन्स भलिबल च्याम्पियनसिप जेठको दोस्रो साता हुने भएको छ। प्रतियोगिता ८ देखि १५ सम्म त्रिपुरेश्वस्थित दशरथ रंगशालाको कभर्ड हुलमा हुनेछ। प्रतियोगितामा कुल ८ देशको सहभागिता रहनेछ। प्रतियोगितामा नेपालसँगै इरान, किर्गिस्तान, भारत, श्रीलंका, बंगलादेश, माल्दिभ्स र काजाकिस्तान रहेका छन्। प्रतियोगिता अन्तर्राष्ट्रिय भलिबल महासंघको औपचारिक कार्यक्रम रहेको हुनाले यसको प्रभाव विश्व वरीयतामा पनि पर्नेछ। प्रतियोगितालाई लिएर आइतबार आयोजित पत्रकार सम्मेलनमा संघका अध्यक्ष जितेन्द्रबहादुर चन्दले सबै तयारी पूरा भएको बताए। पत्रकार सम्मेलनकै अवसरमा प्रतियोगिताको ट्रफि पनि सार्वजनिक गरिएको थियो। प्रतियोगिताको कुल बजेट दुई करोड ५० लाख रुपैयाँ रहनेछ। तयारीका लागि अहिले १६ खेलाडी सम्मिलित नेपाली टिमको प्रशिक्षण चलिरहेको छ।

काभा वुमन्स च्याम्पियनसिप जेठ दोस्रो साताबाट, ट्रफी सार्वजनिक

काठमाडौँ। अन्तर्राष्ट्रिय रग्बी रेफ्री प्रेम कोइराला एसियन रग्बीको डेभलपमेन्ट प्यानलमा पर्न सफल भएका छन्। डेभलपमेन्ट प्यानलमा पर्न सफल उनी पहिलो नेपाली रेफ्री बनेका छन्। उनले सन् २०२३ मा विश्व रग्बीबाट प्रदान गरिने “वर्ल्ड लेभल–२ डेभलपमेन्ट म्याच अफिसियल” रेफ्री सर्टिफिकेट प्राप्त गर्दै उक्त उपलब्धि हासिल गर्ने पहिलो नेपाली रग्बी रेफ्री बन्न सफल भए। एसिया रग्बी रेफ्री कमिटीले प्रत्येक वर्ष सदस्य राष्ट्रका उत्कृष्ट रेफ्रीहरूलाई अनुभव, प्रदर्शन, मूल्याङ्कन र शारीरिक फिटनेसका आधारमा छनोट गर्ने गर्दछ। यही प्रक्रियाअन्तर्गत प्रेम कोइराला सन् २०२६ मा “डेभलपमेन्ट प्यानल” मा पर्न सफल भएका हुन्। यो उपलब्धि पाए सँगै प्रेमले अब एसिया रग्बी अन्तर्गतका आधिकारिक प्रतियोगितामा मुख्य रेफ्रीको भूमिका निर्वाह गर्न सक्नेछन्। साथै अब उनले आफ्नै खर्चमा अन्तर्राष्ट्रिय रेफ्री बन्नु पर्नेछैन। कोइरालाले यो उपलब्धिलाई आफ्नो लामो समयदेखिको धैर्यता भनेका छन्। उनले भने, "मैले यसको लागि धेरै समय धैर्य भएर आफ्नो भूमिका निभाइरहे। त्यसको मूल्याङ्कन भएको ठानेको छु।" यसअघि प्रेमले सन् २०२३ मा विश्व रग्बीबाट प्रदान गरिने 'वर्ल्ड लेभल–२ डेभलपमेन्ट म्याच अफिसियल' रेफ्री सर्टिफिकेट प्राप्त गरेका थिए। उनी यही वैशाख ३१ गते उज्बेकिस्तानमा आयोजना हुने सेन्ट्रल तथा दक्षिण एसियाली रग्बी प्रतियोगितामा रेफ्रीको भूमिका निर्वाह जाँदैछन्। प्रेम भन्छन्, "उज्बेकिस्तानको प्रदर्शन डेभलपमेन्टमा पर्ने आधार भनिएको थियो। तर त्यहाँ जानु अगाडि नै प्यानलमा परेको सूचना पाएँ। यो भन्दा खुसीको कुरा मेरो लागि के हुन्छ।" डेभलपमेन्ट प्यानलमा गरेपछिको बढुवा भनेको ट्यालेन्ट आइडेन्टीफिकेसन प्यानल ( टीआइपी) र त्यसपछि इलाइट प्यानलको रेफ्री बन्नु हुन्छ। प्रेमले आगामी लक्ष्य त्यसैमा केन्द्रित हुने पनि बताए।&nbsp;

प्रेम कोइराला एसियन डेभलपमेन्ट प्यानलमा पर्ने पहिलो रग्बी रेफ्री

काठमाडाैं। नेपाल खेलकुद पत्रकार मञ्च गण्डकीले १०औँ रारा पोखरा स्पोर्ट्स अवार्डका अवसरमा ओलम्पियन टीका बहादुर बोगटीलाई ‘लाइफटाइम एचिभ्मेन्ट अवार्ड’ बाट सम्मानित गर्ने भएको छ। वि.सं. २०१९ सालमा गोरखाको ताप्ले गाउँमा जन्मिएका बोगटीले एथ्लेटिक्सको माध्यमबाट नेपालको गौरवलाई अन्तर्राष्ट्रिय जगतमा पु¥याए बापत यो सम्मान पाउन लागेका हुन्। गोरखाका भिराला पाखाहरूमा दौडिँदै हुर्किएका उनले २०३७ सालमा नेपाली सेनामा भर्ना भएपछि खेल जीवनलाई व्यावसायिक रूपमा अगाडि बढाएका थिए। २०४४ सालदेखि अन्तर्राष्ट्रिय ट्रयाकमा पाइला राखेका बोगटीले राष्ट्रिय स्तरका थुप्रै प्रतियोगिताहरूमा स्वर्ण पदक जितेर आफूलाई अब्बल सावित गरे। बोगटीको खेल जीवनको सबैभन्दा ठूलो उपलब्धि सन् १९८८ को सियोल ओलम्पिक र १९९६ को एटलान्टा ओलम्पिकमा नेपालको प्रतिनिधित्व गर्नु हो। विश्वका हस्ती धावकहरूसँगै ओलम्पिकको ट्रयाकमा दौडिएर उनले नेपालको चन्द्र–सूर्य अंकित झण्डालाई विश्वमाझ चिनाएका थिए। उनले सन् १९९४ मा भएको १२ औँ एसियाली खेलकुदमा समेत सहभागिता जनाएका थिए। दक्षिण एसियाली खेलकुद (साग) मा उनको प्रदर्शन निकै लोभलाग्दो रह्यो। चौथो देखि सातौँ सागसम्म लगातार सहभागी भएका उनले १९९१ मा श्रीलंका र १९९३ मा बंगलादेशमा काश्य पदक जितेका थिए भने १९९५ मा भारतको मद्रासमा भएको सागमा स्वर्ण पदक चुम्न सफल भए। अन्तर्राष्ट्रिय म्याराथनमा नेपालको प्रतिनिधित्व गर्दै सिंगापुर र अस्ट्रेलिया जस्ता देश पुगेका बोगटीले सन् १९८९ मा जर्मनीबाट तीन हप्ताको कोचिङ कोर्स समेत पूरा गरेका थिए। खेलका क्रममा उनले अनेकौँ उतारचढाव र अभावहरू भोगे। आमाको निधन हुँदाको मर्माहत पीडामा समेत उनले खेललाई निरन्तरता दिएको स्मरण गरे। खेल जीवनमा प्राप्त सफलताकै कारण उनलाई तत्कालीन सरकारले ’गोरखा दक्षिणबाहु’ बाट समेत विभूषित गरेको थियो। तत्कालीन समयमा अहिलेको जस्तो सेवा सुविधा नभए पनि दृढ संकल्पका साथ आफू खेलमा लागिरहेको उनले बताए। हाल ६४ वर्षको उमेरमा पुगेका बोगटी अझै पनि उत्तिकै ऊर्जावान् छन्। खेलबाट सक्रिय विश्राम लिएपछि उनी अहिले गोरखाको आफ्नै माटोमा कृषि कर्ममा रमाइरहेका छन्। खेतीपातीसँगै उनले नयाँ पुस्तालाई एथ्लेटिक्सको ज्ञान र अनुशासन सिकाउने गुरुको जिम्मेवारी समेत निभाइरहेका छन्। गाउँको विकास निर्माण र सामाजिक संघसंस्थामा स्वयंसेवकको भूमिकामा सक्रिय बोगटीले समाज सेवालाई पनि उत्तिकै महत्व दिएका छन्। एउटा सफल धावकदेखि कर्मशील किसानसम्मको उनको यो प्रेरक यात्रालाई सम्मान गर्दै प्रदान गर्न लागिएको यो अवार्डलाई नेपाली खेलकुदको सुनौलो इतिहासको सम्मानका रूपमा हेरिएको छ। आगामी वैशाख ३१ गते पोखरा इभेन्ट सेन्टरमा आयोजना हुने अवार्डमा विभिन्न नौ विधामा अवार्ड प्रदान गरिदै छ। हिमश्री फुड्सको उत्पादन रारा तयारी चाउचाउको मुख्य प्रायोजन रहेको उक्त अवार्ड कार्यक्रममा लाइफटाईम एचिभमेन्ट अवार्ड, वर्ष उत्कृष्ट प्रशिक्षक, वर्ष उत्कृष्ट खेलाडी पुरुष, वर्ष उत्कृष्ट महिला, वर्ष उदियमान खेलाडी, वर्ष उत्कृष्ट खेल संघ संस्था, पिपुल्स च्वाइस अवार्ड, स्पेशल अवार्ड र वर्ष उत्कृष्ट खेल पत्रकार रहेका छन्। पोखरा स्पोर्टस अवार्डमा पिपुल्स च्वाइस अवार्डका लागि गुरुङ गहना घर प्रालिले स्कुटर प्रायोजन गरेको छभने स्पेशल अवार्डका लागि नेलम्बो नेपालले प्रायोजन गरेको छ। अवार्डका लागि गण्डकी प्रदेश सरकार, प्रदेश खेलकुद परिषद् गण्डकी, पोखरा महानगरपालिका, राष्ट्रिय खेलकुद परिषद काठमाडाैं, केल्मी नेपाल, नेपाल खेलकुद पत्रकार मञ्च काठमाडाैं, फोर स्टार डिलक्स हेरिटेज टेम्पल बेल बुटिक होटल एण्ड स्पा पोखरा लेकसाईड, होटल क्राउन प्लाजा काठमाण्डौ, जिल्ला खेलकुद बिकास समिति कास्की, बुल्स मेन क्लबका संस्थापक इश्वर गुरुङ (हङकङ), पोखरा एभेन्जर्स, टाइगर ग्रुप अफ पोखरा, तमु धिँ युके, चन्द्र÷शान्ता गुरुङ गोर्खा हिल क्यास एण्ड क्यारी(युके), रुपा गाउँपालिका, मादी गाउँपालिका, अन्नपूर्ण गाउँपालिका र माछापुच्छ्रे गाउँपालिकाको विशेष सहयोग रहेको छ। त्यसैगरी सहयोगीहरुमा सहारा क्लब पोखरा, सहारा युके, सहारा हङकङ, पोखरा महानगरपालिका वडा नं १, वडा नं ३, वडा नं ७, वडा नं ८, वडा नं ९, वडा नं १०, वडा नं १२, वडा नं १३, वडा नं १४, वडा नं १५, वडा नं १७ र वडा नं २६, पोखरा उद्योग वाणिज्य संघ, लेखनाथ उद्योग वाणिज्य संघ, भूतपूर्व खेलाडी मञ्च, कास्की जिल्ला तेक्वान्दो संघ, मञ्चका पूर्व अध्यक्ष प्रेम नारायण न्यौपाने, पत्रकार महासंघ जापानका पूर्व अध्यक्ष तथा मञ्चका पूर्व अध्यक्ष मोहन घले, &nbsp;विनोद गुरुङ, जापानबाट युवराज गुरुङ, निशान रानामगर, रमेश कुमार गुरुङ, पूर्व राष्ट्रिय खेलाडी बसन्त गौचन, किरण थापा अष्ट्रेलिया, प्रेमकाजी गुरुङ अष्टे«लिया, राइनो हस्पिटालिटी एण्ड होटल म्यानेजमेन्ट प्रालि (राइनो क्याफे एण्ड शवार्मा स्टेशन), शिद्धार्थ पाण्डे कम्प्युटर सेन्टर न्युरोड, दीपक बहादुर थापा (पूर्व वडा सदस्य पो.म.न.पा. १०) लामा कलेक्सन न्यूरोड पोखरा, प्रेम पुन (पुन फोटोग्राफी), हेम्जाकोट होमस्टे कास्की रहेका छन्।&nbsp;

ओलम्पियन टीका बहादुर बोगटीलाई लाइफटाइम एचिभ्मेन्ट अवार्ड

म्यानचेस्टर सिटीले शनिबार इंग्लिस प्रिमियर लिगमा शनिबार ब्रेन्टफोर्डलाई पराजित गर्दै शीर्षमा रहेको आर्सनलसँगको दूरी दुई अंकमा कायम राख्यो । सिटीको ३५ खेलबाट ७४ अंक भएको छ । आर्सनल ७६ अंकमा छ । आर्सनलले आइतबार वेस्ट ह्यामको सामना गर्दैछ र यो खेल आफैमा चुनौतीपूर्ण हुनेछ । इतिहाडमा भएको खेलमा सिटीका लागि जेरेमी डोकु, इर्लिङ हालान्ड र ओमर मारमोसले एक एक गोल गरे । शनिबारका अन्य खेलमा सन्डरल्यान्ड र म्यानचेस्टर युनाइटेडले गोलरहित बराबरी खेले । यस्तै बर्नमाउथले फुलहमलाई १–० र ब्राइटनले उल्भ्सलाई ३–० ले पराजित गर्न सफल रह्यो ।

सिटी आर्सनलसँग दुई अंकको दूरीमा

गुजरात टाइटनसले शनिबार इन्डियन प्रिमियर लिग (आईपीएल) २०२६ मा राजस्थान रोयल्समाथि ७७ रनको प्रभाविशाली जित निकालेर अंक तालिकाको दोस्रो स्थानमा उक्लेको छ । गुजरातको १४ अंक भएको छ । राजस्थान भने १२ अंकमा पाँचौं स्थानमा रह्यो । शुभमन गिलले ४४ बलमा बनाएको ८४ रनको मदतले गुजरातले पहिले ब्याटिङ गर्दै चार विकेटमा २ सय २९ रन बनाएको थियो । गिलले पहिलो विकेटका लागि साइ सुदर्शनसँग १ सय १८ रनको साझेदारी गरे । सुदर्शनले ५५ रन जोडे । प्रतिउत्तरमा राजस्थानले १६.३ ओभरमा अलआउट हुन अगाडि १ सय ५२ रन मात्र बनायो र रविन्द्र जडेजाले बनाएको ३८ रन नै सबैभन्दा ठूलो व्यक्तिगत स्कोर रह्यो । रसिद खान ३३ रनमा चार विकेट लिन सफल भए ।

राजस्थानलाई हराएर गुजरात दोस्रोमा

काठमाडौं। आईसीसी विश्वकप लिग २ सिरिजका लागि नेपाली टोलीको घोषणा गरिएको छ। नेपाल क्रिकेट संघ (क्यान)ले नेपाल, अमेरिका र स्कटल्याण्ड सम्मिलित सिरिजका लागि रोहित पौडेलको कप्तानीमा १५ सदस्यीय टोली घोषणा गरेको हो। टोलीमा इशान पाण्डे पनि अटाएका छन्। उनले ७ वर्षपछि राष्ट्रिय टीममा पुनरागमन गरेका छन्। २०१९ मा उनले जिम्बाब्वेविरुद्ध टी–२० आई खेलेका थिए। उक्त खेलमा उनी ८ बलमा ४ रन बनाएर आउट भएका थिए। प्रधानमन्त्री कपमा सानदार प्रदर्शन गरेका पाण्डेले नेपाल ‘ए’ टीमबाट प्रतियोगिता खेल्ने स्कटल्याण्ड र अमेरिकाविरुद्ध पनि राम्रो पदर्शन गरेका थिए। प्रतियोगिता मे १२ देखि २२ सम्म कीर्तिपुरस्थित टियु मैदानमा सुरु हुनेछ। यसअघिको ओमान र यूएईसँगको सिरिजमा नेपालले ४ खेलमा ३ जित निकालेको थियो। नेपाली टोलीः रोहित पौडेल (कप्तान) दीपेन्द्रसिंह ऐरी (उपकप्तान), कुशल भुर्तेल, आरिफ शेख, भीम सार्की, आशिफ शेख, ईशान पाण्डे, गुलशन झा, सोमपाल कामी, सन्दीप लामिछाने, ललित राजवंशी, विनोद भण्डारी, नन्दन यादव, अर्जुन कुमाल र करण केसी

इशानलाई समेट्दै नेपाली टोलीको घोषणा

इंग्लिस प्रिमियर लिगमा लिभरपुलले शनिबार चेल्सीसँग निराशानाजक १–१ को बराबरी खेलेको छ । एनफिल्डमा भएको खेलमा लिभरपुलले ग्रेभेनबेर्चको गोलले छैटौं मिनेटमा लिएको थियो । इन्जो फर्नान्डेजले ३५ औं मिनेटमा फ्रि–किकबाट बराबरी गोल फर्काए । त्यसपछि थप गोल हुन सकेन र लिभरपुल निराशाजनक बराबरीमा चित्त बुझाउन बाध्य रह्यो । यो नतिजापछि लिभरपुल अर्को सिजन युरोपेली च्याम्पियन्स लिगमा छनोटको नजिक पुगेको छ । लिभरपुल ३६ खेलबाट ५९ अंकमा चौथो स्थानमा रह्यो । चेल्सी भने समान खेलबाट ४९ अंकमा नवौं स्थानमा रह्यो । लिगमा लगातार छ हारपछि चेल्सी यो बराबरी निकाल्न सफल रहेको हो ।

चेल्सीसँग लिभरपुलको निराशाजनक बराबरी

काठमाडौं। ह्विलचियर स्पोर्ट्स एसोसिएसन (डब्ल्यूएसए) ले तेस्रो वडा कप महिला ह्विलचियर बास्केटबल प्रतियोगिताको उपाधि जितेको छ। राष्ट्रिय अपांग महिला समाजको आयोजनामा ज्ञानेश्वरस्थित ग्यालेक्सी पब्लिक स्कुलमा शनिबार सम्पन्न प्रतियोगितामा डब्ल्यूएसएले लिगकाे तीनवटै खेलमा विजयी हुँदै ६ अंकसहित च्याम्पियन बनेको हो। उपाधिसँगै टोलीले १५ हजार रुपैयाँ पुरस्कार प्राप्त गर्‍यो। डब्ल्यूएसएले लिग चरणमा जावलाखेल ह्विलचियर स्पोर्ट्स क्लबलाई ४–२, स्पाइनल कर्ड इन्जुरी नेटवर्क नेपाललाई २०–४ तथा बीआईएलाई १७–२ ले पराजित गरेकाे थियाे। यस्तै, जावलाखेल दोस्रो स्थानमा रहँदै उपविजेता बन्यो। उसले तीन खेलमध्ये दुईमा जित र एकमा हार बेहोर्दै ५ अंक जोड्यो। उपविजेता टोलीले १० हजार रुपैयाँ प्राप्त गर्‍यो। तेस्रो स्थान हासिल गरेको एससिआइएनएनले पाँच हजार रुपैयाँ हात पार्‍यो। उसले तीन खेलमध्ये एकमा जित र दुईमा हार बेहोर्दै ४ अंक जोडेको थियो। चौथो स्थानमा रहेको बीआईए भने तीनवटै खेलमा पराजित भयो। प्रतियोगितामा चार टोलीको सहभागिता रहेको थियो। प्रतियोगिताका टेक्निकल हेड तथा कमिस्नर प्रेमसुन्दर होनाले विजयी टोलीलाई दुई तथा पराजित टोलीलाई पनि एक अंक प्रदान गरिएको जानकारी दिए। व्यक्तिगत विधातर्फ हिउँकला साउद सर्वाधिक स्कोरकर्ताका रूपमा सम्मानित भइन्। उनले प्रतियोगिताभर २४ स्कोर गरेकी थिइन्। त्यसैगरी, डब्ल्यूएसएकी ज्योति अर्याल ‘मोस्ट भ्यालुएबल प्लेयर’ घोषित भइन्। दुवै खेलाडीले जनही एक हजार रुपैयाँसहित ट्रफी प्राप्त गरे। समापन समारोहमा काठमाडौं महानगरपालिका–३० का वडाध्यक्ष दलबहादुर कार्की, नेपाल बास्केटबल संघका अध्यक्ष भीमसिंह गुरुङ तथा राष्ट्रिय अपांग महिला समाजकी अध्यक्ष देवी आचार्य लगायतको उपस्थिति रहेको थियो। प्रतियोगिता सम्पन्न गर्न काठमाडौं महानगरपालिका–३० ले विशेष सहयोग गरेको थियो। यस्तै, सक्षम नेपालका अध्यक्ष बिरुकमल श्रेष्ठले स्पाइनल कर्ड इन्जुरी भएका महिला खेलाडीलाई ३० थान डाइपर वितरण गरेका थिए।

महिला ह्विलचियर बास्केटबलको उपाधि डब्ल्यूएसएलाई

काठमाडाैं। नेपाल खेलकुद पत्रकार मञ्च गण्डकीले आयोजना गरेको दशौं रारा पोखरा स्पोर्ट्स अवार्ड–२०८२ को मिति नजिकिएसँगै मनोनयनमा परेका खेलाडीमध्ये उत्कृष्टको होला भन्ने चर्चा चल्न थालेको छ। मञ्चले वैशाख ३१ गते पोखरा इभेन्ट सेन्टरमा विभिन्न ९ विधामा अवार्ड प्रदान गर्दैछ। पिपुल्स च्वाइस अवार्डको मनोनयनमा परेका ५ जना खेलाडीको लागि भने दुई सातायता भोटिङ भइरहेको छ। जसमा फुटबलका दीप कार्की, एथलेटिक्सकी नारायणी भण्डारी, भलिबलका राजन दर्लामी, क्रिकेटका विपीन खत्री र मुवाथाई÷आइटिएफ तेक्वान्दोकी सुस्मिता थापा मगर मनोनयनमा परेका छन्। मनपर्ने खेलाडीलाई खल्ती एपमा गई भोटिङ गर्ने सुविधा छ। सर्वाधिक भोट ल्याउनेमध्ये एकजनाले अवार्डसहित स्कुटर प्राप्त गर्नेछन्। त्यसका लागि पोखरा न्यूरोडको गुरुङ गहनाघर प्रालि स्कुटर प्रायोजन गरिसकेको मञ्चले जनाएको छ। भोटिङ पार्टनर खल्ती रहेकाे छ। दीप कार्की (फुटबल)दीप कार्की जसको टिममा लिडिङ, सेभिङ तथा पेनाल्टी गरी सबै पक्ष राम्रो भएका खेलाडी हुन्। दोलखा जिल्लाको बोथ गाउँमा जन्मिएका कार्की ६ महिनाकै हुँदादेखि पोखरा आएका हुन्। हाल पोखरा बगर निवासी उनी २८ वर्ष भए। सुरुआतमा उनले कास्की लिग खेले। बिस्तारै विभिन्न प्रतियोगितामा सफलता हात पर्दै गए पछि सन् २०१९ मा राष्ट्रिय टिममा पर्न सफल भए। सन् २०२२ मा त उनले कुवेतमा भएको एशियन क्वालीफायर्समा डेब्यू गरे। गत वर्ष काठमाडौंमा सम्पन्न सभापति कप संकटा क्लबबाट खेल्दा उनी बेस्ट फ्लेयर हुन सफल भए। सन् २०१९ को सहिद स्मारक ए डिभिजन लिगमा मनाङबाट खेल्दा उनी उत्कृष्ट गोलकीपर घोषित भएका थिए। सन् २०२३ मा हेटौडा गोल्डकपमा बेस्ट प्लेयर हुँदै बुलेट मोटरसाइकल चढेका थिए। विभिन्न क्लबबाट खेलिसकेका उनी धेरैजसो चर्च ब्वाइजबाट खेलेको बताउँछन्। गत वर्ष उनी २५औं संस्करणको आहा रारा पोखरा गोल्डकप खेल्दा चर्च ब्वाइजमा थिए। नारायणी भण्डारीगएको जेठमा १५ औं राष्ट्रपति रनिङ शिल्डमा कीर्तिमानसहित उत्कृष्ट प्रदर्शन गरेकी नारायणी भण्डारी आफैँलाई पनि कति इभेन्ट खेलेर कति वटा पदक हात पारेँ भन्ने हेक्का छैन। भाग लिएका हरेकजसो प्रतियोगितामा उनलले कुनै न कुनै पदक नजिती फर्किन्नन्। &nbsp; १५औं राष्ट्रपति रनिङ शिल्डमा उनले २८ वर्षअघिको रेकर्ड तोडेर चर्चामा आएकी थिइन्। ८०० मिटर दौड उनले मात्र २ मिनेट १७ सेकेण्ड ९ मिली सेकेण्डमा पूरा गर्न सफल भइन्। त्यसअघिको टीका चौधरीको नाममा २ मिनेट २८ सेकेण्ड ९ मिलीसेकेण्डको रेकर्ड थियो। सोही प्रतियोगितामा उनले १५०० मिटरमा स्वर्ण र रिले दौडमा रजत पदक हासिल गरेकी थिइन्। प्रदेश खेलकुद परिषद् गण्डकीले उनको यो उपलब्धिको कदर गर्दै वर्षको सर्वोत्कृष्ट खेलाडीको रुपमा नगद ४३ हजारसहित पुरस्कृतसमेत गरेको थियो। पोखरा ओपन नेशनल एथलटिक्स मिट–२०२५ मा उनी १५०० मिटर दौडमा समेत सिनियर नेशनल च्याम्पियन बन्न सफल भएकी थिइन्। छोरेपाटन स्कुलकी यी छात्रा नारायणीले यतिखेर १२ को परीक्षा दिइरहेकी छन्। पोखरा स्पोर्टस् अवार्डको पिपल च्वाइस अवार्डमा मनोनयनमा परेपछि खुसी हुँदै उनी भन्छिन्, ‘नयाँ अपरच्यूनिटी पाइयो। यसले हामीलाई अझ हौसला दिन्छ। खेलाडीको मनोबल बढ्दै जाँदा अरु खेलाडीहरु पनि उत्पादन हुँदै जान्छन्।’ राजन दर्लामी (भलिबल)राजन दर्लामी मगर १३ वर्षको उमेरदेखि नै भलिबल खेलिरहेका छन्। जब उनी भलिबल कोर्ट उत्रिन्छन्, उनका फ्यान राजनको पक्षमा हुटिङ गरिरहेका हुन्छन्। स्याङ्जाको चापाकोट ५, सेखामका यी लिबेरोले हालै छैटौं संस्करणको टाइगर कप भबिबल प्रतियोगिता र नवलपुरमा भएको दोस्रो संस्करणको जिएम कपमा टिमलाई उपाधि दिलाउन महत्वपूर्ण योगदान दिएका थिए। जिएम कपमा त उनलाई बेस्ट डिफेन्डरको उपाधि दिइएको थियो। रुकुमको टकसेरामा गत वर्षको ३०औं वार्षिक राष्ट्रिय भलिबलमा पनि उनको टिम तेस्रो हुन सफल भएको थियो। उनले हालै सम्पन्न पीएम कप एनभीए भलिबल लिगमा बेस्ट डिफेन्डरको उपाधि जितेका थिए। त्यसअघि, २०७७ सालको टाइगर कप होस् वा ०७३ सालको काठमाडौंमा सम्पन्न नयाँबजार राष्ट्रिय च्याम्पियनसिपमा पनि सोही उपाधि हात पारेका थिए। २०६२÷६३ सालयता विभिन्न ठाउँ पुगेर उनले थुप्रै प्रतियोगितामा भाग लिएको अनुभव सुनाउँछन्। उनी सम्मिलित रुकुम भलिबल टिम फेरि विदेशमा काभा खेल्न जाँदैछ। गाउँघरमा भलिबल खेल्दाखेल्दै उनमा खेलप्रति मोह जागेको रहेछ। बीचमा सिंगापुर पुलिसमा देखाएका उनी असफल बनेपछि कोरिया जान भाषा परीक्षा पनि नपढेका होइनन्। आखिर उनलाई भलिबलबाटै नाम दाम कमाउन लेखेको रहेछ। उनी भन्छन्, पिपल च्वाइस अवार्डमा पर्नु मेरो लागि सफलता हो। नेपालको राष्ट्रिय खेल भलिबलको विकासका लागि सम्पूर्ण संघसंस्था तथा सरकारी पक्षबाट सहयोग हुनुपर्छ।’ आफ्नो सबै रहर सबै कुरा त्यागेर खेलिरहेको छु, राज्यको लागि खेल्ने खेलाडीहरुका लागि केही न केही राहत होस्।’ विपीन खत्री (क्रिकेट)लेफ्टआर्म स्पीनर तथा राइट ह्याण्ड ब्याट्सम्यान पोखरेली विपिन विगत १५ वर्षदेखि क्रिकेट खेलिरहेका छन्। विगतमा यु–१९ विश्वकप क्रिकेट टोलीको बन्दसत्रमा छनोटपछि त्यसयता उनले पछाडि फर्केर हेर्नुपरेको छैन। २८ वर्षीय खत्रीले गण्डकी प्रदेशको पुरुष सिनियर टोलीको कप्तानी सम्हालिसकेका छन्। उनी हाल नेपाल ए टिमबाट स्कटल्याण्ड र युएसएसँगको सिरिज खेलिरहेका छन्। उनी सम्मिलित नेपाल ए ले स्कटल्याण्ड र युएसएसँग एक एक जित हात पारिसकेको छ। विगतमा धनगढीमा सम्पन्न मुख्यमन्त्री क्रिकेट कपमा उनी उत्कृष्ट बलर घोषित हुँदा सन् २०१६ मा काठमाडौंमा सम्पन्न प्रथम प्रधानमन्त्री कप क्रिकेट प्रतियोगितामा उदियमान खेलाडीको उपाधि पनि उनकै पोल्टामा परेको थियो। विपीन आफूलाई क्रिकेटको मोह स्कुले जीवनकालमै बसेको बताउँछन्। प्रधानमन्त्री कपदेखि इपिएल, डिपीएल र पिपिएलमा खेलिसकेका उनी पाँचौ संस्करणको स्पोर्टस् अवार्डमा उदीयमान विधामा पौडीकी डुवाना लामा र टेनिसका प्रदीप खड्कासँग प्रतिस्पर्धामा थिए। पोखरा स्पोर्टस् अवार्डमा दोस्रोपल्ट मनोनयन परेकामा निकै खुसी लागेको उनको प्रतिक्रिया छ। प्रादेशिक क्रिकेट संघ गण्डकी अध्यक्ष सञ्जयकान्त सिग्देल विपीनलाई निकै राम्रो खेलाडी भएको बताउँछन्। उनले भने, ‘पिएम कपमा उनले लामो समयदेखि डिजर्भिङ गर्दै आएका छन्। नेपाल एमा पनि राम्रो गरेका छन्।’ सुस्मिता थापामगर (आइटीएफ तेक्वान्दो÷मुआथाई)२०६० सालमा बागलुङको बडिगाड गाउँपालिका १० मा जन्मिएकी सुस्मिता थापामगर आएटीएफ तेक्वान्दो र मुवाथाई दुबैको राम्रो प्लेयर हुन्। गण्डकी प्रदेशको प्रतिनिधित्व गर्दै आइरहेकी उनले छोटो समयमै उचाई हासिल गरिसकेकी छिन्। विश्व मुआथाई परिषद् (डब्लुबिसी) को महिला र्यांकिङमा सूचिकृत हुन सफल नेपाली खेलाडी सुस्मिताले यसअघि नेपालमा भएका ३ ठूला प्रतियोगिताहरु जितेर सनसनी मच्चाएकी थिइन्। कक्षा ६ पढ्दा भलिबल खेलेकी उनी विद्यालयस्तरमा प्रतियोगिताहरुमा भाग लिई विभिन्न पदक जिते पनि २०७४ कार्तिकमा उनी पढ्दै गरेको भानु निमाविमा रवीन्द्र बुढामगरले आईटीएफ तेक्वान्दो डोजाङ सञ्चालन गरेपछि तेक्वान्दोमा आकर्षित भएको बताउँछिन्। खेलमा राम्रो गर्दै आएकै कारण उनी अघिल्लो वर्ष नेपाल तेक्वान्दो महासंघबाट उत्कृष्ट खेलाडीसमेत घोषित भएकी थिइन्। पोखरा स्पोर्टस् अवार्डमा धेरैजसो मनोनयनमा पर्दै आएकी उनी पछिल्लो नवौं संस्करणमा भने भलिबलकी अरुणा शाहीलाई अवार्ड सुम्पिएकी थिइन्। यसपालि पुनः पिपुल्स च्वाइसको मनोनयनमा पर्न सफल भएकी छन्।

पोखरा स्पोर्ट्स अवार्डः पिपुल्स च्वाइसमा ५ खेलाडीबीच प्रतिस्पर्धा

दोलखा चेस होम, नेपालले यहि बैशाख २८ गतेदेखि जेठ २ गते सम्म छैटौं खुल्ला अन्तर्राष्ट्रिय बुद्धिचाल प्रतियोगिता आयोजनाको तयारी पूरा भएको पत्रकार सम्मेलन मार्फत जानकारी गराएका छन्। क्लबका अध्यक्ष एवं प्रतियोगिताका संयोजक गोविन्द मान श्रेष्ठले अन्तर्राष्ट्रिय चेस स्पर्धाको छैटौं संस्करणमा क्लासिकल तथा रापिड दुई विधाको खेल सञ्चालन गर्ने बताएका छन्। शुक्रबार सम्पन्न पत्रकार सम्मेलनमा दोलखा जिल्ला खेलकुद बिकास समितिका पूर्व अध्यक्ष उद्धव पोखरलले दुबै चेस विधाकाे च्याम्पियन ट्रफि तथा मेडल सार्वजनिक गरेका छन्। चरिकोट स्थित सिम्पानी सभाहलमा सञ्चालन हुने चेस प्रतियोगितामा नेपाल सहित अमेरिका, रसिय, चाइना, मंगोलिया, फिलिपिन्स, भारत, बंगलादेश, श्रीलंका लगायतका १० राष्ट्रका खेलाडीहरुको सहभागीता रहने जानकारी गराएका छन्। रसियाका २४८६ रेटेड ग्रायण्ड मास्टर किरियाकोभ पिटले उच्च वरियता प्राप्त गरेका छन् भने भारतका २३३१ रेटेट अर्पण दास दोस्रो वरियता र बंगलादेशका २१५६ रेटेड एफएम नयम हक तेस्रो वरियता लिएर प्रतिस्पर्धामा होमिने भएका छन्।&nbsp; नेपाल च्याम्पियन एफएम रुपेश जैसवाल २१०३ रेटिङ सहित चौथो वरियतामा हुनेछन् भने अन्य खेलाडीको हकमा जुनियर १० वर्ष देखि सिनियर ८५ वर्षका खेलाडी गरि ३५० जनाले प्रतिस्पर्धा गर्नेछन्। विश्व बुद्धिचाल महासंघ (फिडे), एशियन चेस फेडेरेशन (एआईसिएफ), नेपाल बुद्धिचाल महासंघ(एनसिएफ)को तत्त्वावधानमा सञ्चालन हुने अन्तर्राष्ट्रिय चेसका लागि कूल २५ लाख ५२ हजार खर्च हुने अनुमानित बजेटमा विजेयी खेलाडीहरुले नगद ६ लाख ६७ हजार ५ सय पुरस्कार प्राप्त गर्ने छन्।&nbsp; जस अन्तर्गत ९० मिनेट ३० सेकेण्ड इन्क्रिजमेण्टको क्लासिकल विधामा ५ लाख २ हजार नगद पुरस्कार रहनेछ भने महासंघका पूर्व उपाध्यक्ष एफएम सुजेन्द्र प्रसाद श्रेष्ठ स्मृति रापिड विधा तर्फ १लाख ७१ हजार ५ सय नगद पुरस्कार प्रदान गरिने छ।&nbsp; प्रतियोगिताको दुवै विधा तर्फ शीर्ष १५ जना सहित उत्कृष्ट महिला, सिनियर, लोकल, युवा १२,१४,१६ वर्ष, नयाँ खेलाडी, रेटिङ १६ र १८ सय मुनि गरि जम्मा १०८ जनाले पुरस्कार रकम बाँड्ने छन्।&nbsp; फिडे इभेण्ट कोड ४७१७९१ मान्यता प्राप्त अन्तर्राष्ट्रिय खेलको प्रमुख निर्णायक नेपाली अन्तर्राष्ट्रिय आर्विटर निरञ्जन प्रजापतिको रेखदेखमा प्रतियोगिता सञ्चालन हुनेछ।&nbsp; मोफसलमा खेल आयोजना गरि खेल बिकास तथा स्थानीय पर्यटन प्रवर्द्धनमा टेवा पुर्‍याउने लक्ष्यका साथ आयोजना हुने स्पर्धामा स्थानीय पालिकाका जनप्रतिनिधि सहित राखेपका सदस्यसचिव रामचरित्र मेहता, महासंघका अध्यक्ष हेराकाजी महर्जन लगायतले कार्यक्रम समारोहमा सहभागी जनाउने छन्।

दोलखा जिल्लामा अन्तराष्ट्रिय बुद्धिचाल खेल हुने

नाइट राइडर्सले शुक्रबार इन्डियन प्रिमियर लिग (आईपीएल) २०२६ मा दिल्ली क्यापिटल्सलाई आठ विकेटले हराएर लय समाटेको प्रमाणित गरेको छ । यो जितपछि कोलकाताको नौ अंक भएको छ र सातौं स्थानमा छ । यो शीर्ष चारबाट तीनै अंकको मात्र दूरी हो । प्रतियोगितामा खराव सुरुआत लिएपछि कोलकाता अहिले जितको क्रममा देखिएको हो । दिल्ली भने आठ अंकमै सीमित रहेर आठौं स्थानमा रह्यो । दिल्लीले पहिले ब्याटिङ गर्दै आठ विकेटमा १ सय ४२ रन बनाएको हो । ओपनर पथुम निसान्काले २९ बलमा ५० रन बनाए र यो नै सबैभन्दा ठूलो व्यक्तिगत स्कोर रह्यो । जवाफमा कोलकाताले १४.२ ओभरमा दुई विकेट गुमाएर १ सय ४७ रन बनायो र यो जितका नायक ओपरन एलेन फिन रहे । उनले ४७ बलको मात्र सामना गरेर नटआउट रहेर सय सय रन बनाए । उनले पाँच चौका र दस छक्का प्रहार गरे ।

फिनको शतकमा कोलकाता विजयी

काठमाडौं। नेपाल &nbsp;‘ए’ ले अभ्यास खेलमा अमेरिकाविरुद्ध ३ विकेटको रोमाञ्चक जित दर्ता गरेको छ। जारी अभ्यास खेलमा नेपालको यो लगातार दोस्रो जित हो। यसअघि नेपाल ‘ए’ ले स्कटल्याण्डलाई ४५ रनले पराजित गरेको थियो। माथिल्लो मूलपानी क्रिकेट मैदानमा शुक्रबार सम्पन्न खेलमा अमेरिकाले दिएको २६३ रनको लक्ष्य नेपाल ‘ए’ ले ४९.१ ओभरमा ७ विकेट गुमाउँदै पूरा गर्‍यो। नेपाल ‘ए’ को जितमा मयन यादवले सर्वाधिक ७२ रनको योगदान दिए। उनले ८० बलमा ४ चौका र २ छक्का प्रहार गरे। त्यसैगरी सन्दीप जोहरा ३६, कुशल मल्ल ३३, पवन सर्राफ अविजित २४, कप्तान अनिलकुमार शाह २७ तथा त्रितराज दासले २३ रन बनाए। देव खनाल १७ तथा बसिर अहमद १८ रन बनाएर आउट भए। जारी अभ्यास खेलमा नेपालको यो लगातार दोस्रो जित हो। यसअघि नेपाल ‘ए’ ले बिहिबार स्कटल्याण्डलाई ४५ रनले पराजित गरेको थियो। त्यसअघि टस जितेर पहिले ब्याटिङ गरेको अमेरिकाले निर्धारित ५० ओभरमा ८ विकेट गुमाएर २६२ रन बनाएकाे थियो। अमेरिकाका स्मित पटेलले १०८ बलमा १० चौका र ५ छक्काको सहयोगमा सर्वाधिक ११६ रनको शतकीय इनिङ खेलेका थिए। कप्तान मोनांक पटेल २०, शुभम रञ्जने १६, सञ्जय कृष्णमुर्थी १५ तथा साइतेजा मक्कमल्ला १० रनमा आउट भएका थिए। हरमित सिंह २५ तथा जसदिप सिंह ३३ रनमा अविजित रहेका थिए।&nbsp; नेपाल 'ए' का पवन सरार्फले २ तथा नारायण जोशी, रशिद खान, शेर मल्ल, बसिर अहमद, शाहब आलम र विपिन खत्रीले समान १ विकेट आफ्नो नाममा गरे। तेस्रो अभ्यास खेलमा शनिबार नेपाल 'ए' ले स्कटल्याण्डको सामना गर्नेछ।

अमेरिकामाथि नेपाल  ‘ए’ को जित

काठमाडौँ। नेपाली क्रिकेटर लोकेश बम बेल्जियम टी–२० लिगको एन्टवर्प एन्कर्स क्लबमा अनुबन्धित भएका छन्। उक्त टोलीमा नेपालका विकेटकिपर ब्याटर आसिफ शेख यसअघि नै आबद्ध छन्।&nbsp; टोलीमा न्युजिल्यान्डका स्टार ब्याटर मार्टिन गुप्टिल र वेस्ट इन्डिजका अलराउन्डर आन्द्रे रसेल पनि समावेश छन्।

लोकेश बम बेल्जियम लिगको एन्टवर्प एन्कर्समा अनुबन्धित

काठमाडौं। साउदी प्राे लिगअन्तर्गत अल नासरले अल शबाबमाथि ४–२ काे रोमाञ्चक जित निकालेकाे छ। अल नासरकाे जितमा जाेआओ फेलिक्सले ह्याट्रिक पूरा गर्दा कप्तान क्रिस्टियानाे राेनाल्डाे एक गाेल थपे। खेलकाे तेस्राे र १०औं मिनेटमा फेलिक्सले गाेल गर्दै टोलीलाई सुरुआत दिलाएका थिए। अल शबाबका यानिक करास्काेले ३०औं मिनेटमा गाेल फर्काउँदै खेल २–१ मा ल्याएका थिए। दोस्रो हाफमा क्रिस्टियानाे राेनाल्डाेले ७५औं मिनेटमा गाेल गर्दै अल नासरकाे अग्रता बढाए। त्यसपछि अल शबाबका अली अल–बुलायहीले ८०औं मिनेटमा गाेल गर्दै खेललाई पुनः प्रतिस्पर्धात्मक बनाएका थिए। इन्ज्युरी समयमा दुवै टोलीका खेलाडीबीच तनाव समेत देखिएको थियो। खेलका क्रममा अल नासरका सालेम अल नज्दी तथा अल शबाबका गोलरक्षक मार्सेलाे ग्राेहेले पहेँलो कार्ड पाए। अन्तिम समयमा प्राप्त पेनाल्टीमा फेलिक्सले पुनः गाेल गर्दै टोलीको जित सुनिश्चित गरे। याे जितसँगै नासर ३२ खेलबाट ८२ अंकसहित साउदी प्रोलिगको शीर्ष स्थानमा रहेको छ।

फेलिक्सको ह्याट्रिकमा अल नासरको रोमाञ्चक जित

इंग्लिस प्रिमियर लिग क्लब क्रिस्टल प्यालेसले बिहीबार पहिलो पटक युरोपेली फाइनलको यात्रा निश्चित गरेको छ । युरोपा कन्फ्रेन्स लिगको फाइनलमा प्यालेस र रायो भालेकानो भिड्न लागेका हुन् । प्यालेसले सेमिफाइनल दोस्रो लेगमा साख्तर डोनेस्कलाई २–१ ले हरायो । यस नतिजापछि उसले समग्रमा ५–२ को अग्रता लियो । प्यालेसका तर्फाट दोस्रो लेगमा इस्माइल सालले गरेको गोल निर्णायक रह्यो । अर्को सेमिफाइन्ल दोस्रो लेगमा स्पेनी ला लिगा क्लब भालेकानोले स्ट्रसबर्गलाई १–० ले हरायो । त्यसमा एलेमाओले निर्णायक गोल गरे र यससँगै भालेकानो दुई लेगको सेमिफाइनलमा २–० को निर्णायक अग्रता लिन सफल रहेको हो ।&nbsp;

प्यालेस पहिलो पटक फाइनलमा

युरोपा लिगको फाइनल एस्टन भिल्ला र फ्रेबर्गबीच हुने भएको छ । इंग्लिस प्रिमियर लिग क्लब भिल्लाले सेमिफाइनल दोस्रो लेगमा नटिंघम फरेस्टलाई सजिलै ४–० ले हरायो र समग्रमा ४–१ को अग्रता लियो । भिल्ला पार्कमा भएको खेलमा ओली वाट्किन्स र इमि बेन्डियाले एक एक गोल गरे । यस्तै जोन म्याकगिनले दुई गोल थपे । अर्को सेमिफाइनल दोस्रो लेगमा फ्रेबर्गले ब्रागलाई ३–१ ले हराएर समग्रमा ४–३ को अग्रता लियो । फ्रेबर्गका लागि लुकास कुबेलरले दुई गोल गरे । भिल्ला ४४ वर्षयता पहिलो पटक युरोपेली फाइनलमा पुगेको हो र अब उसको सामु सन् १९९६ को लिगकप उपाधियता पहिलो ठूलो सफलता हात पार्ने अवसर तयार भएको छ ।

भिल्लाको फाइनल प्रतिद्वन्द्वी फ्रेबर्ग

ओपनर मिचेल मार्सले १ सय ११ रनको शानदार प्रदर्शन गरेपछि लखनउ सुपर जायन्ट्सले बिहीबार इन्डियन प्रिमियर लिग (आईपीएल) २०२६ रोयल च्यालेर्न्स बेंगलुरुलाई डीएलएस मेथड अनुसार नौ रनले हराएको छ । यससँगै बेंगलुरुले अंक तालिकाको शीर्ष स्थानमा उक्लिन अवसर गुमाएको छ । यो नतिजापछि बेंगलुरु १२ अंकमा तेस्रो स्थानमा रह्यो । लखनउ भने छ अंकमा दस टिममध्ये सबैभन्दा पुछारमा छ । लखनउले पहिले ब्याटिङ गर्दै तीन विकेटमा २ सय ९ रन बनाएको थियो । मार्सले ५६ बलमा नौ चौका र नौ छक्का प्रहार गरे । खेल वर्षाले प्रभावित भएपछि बेंगलुरुले १९ ओभरमा २ सय १३ रनको लक्ष्य पाएको थियो । त्यसलाई पछ्याउने क्रममा बेंगलुरुले छ विकेटमा २ सय ३ रन मात्र बनाउन सक्यो । कप्तान रजत पाटीदारले सर्वाधिक ६१ रन बनाए, तर यो पर्याप्त रहेन् ।

लखनउसँग बेंलगुरु स्तब्ध

काठमाडौं। राष्ट्रिय युवा संघ नेपालको आयोजनामा आगामी जेठ १ गते पुरुष '१० किमी एनवाईएफएन रन' हुने भएको छ।&nbsp; संघको ३७औं स्थापना दिवसको उपलक्ष्यमा युवा संघले खेल आयोजना गर्न लागेको हो। दशरथ रंगशाला त्रिपुरेश्वरबाट सुरु हुने प्रतियोगिता तीनकुने फन्को मार्दै पुन: रंगशालामा पुगेर टुंगिनेछ।&nbsp; आयोजक राष्ट्रिय युवा संघ नेपालका अध्यक्ष महाराज गुरुङलेले प्रतियोगितामा पाँच सय देखि हजार जनाको सहभागिता रहने विहिवार आयोजित पत्रकार सम्मेलनमा बताए। जसमा खुल्ला प्रतियोगिता भएकोले राष्ट्रिय स्तरको खेलाडी देखि राष्ट्रिय युवा संघका सदस्यहरु सहभागि हुनेछन्।&nbsp; नेपाल एथलेटिक्स संघको प्राविधिक सहयोगमा हुनेछ। प्रतियोगितामा शीर्ष ५ स्थान रहने खेलाडीको लागि पुरस्कारको ब्यवस्था गरिएको छ। जसमा पहिलो हुने खेलाडीले ५० हजार, दोस्रो हुनेले ४० हजार, तेस्रो हुनेले ३० हजार, चौथोले २० हजार र पाँचौं स्थान हात पार्नेले १० हजार प्राप्त गर्नेछन्।&nbsp; बिहीबार आयोजित पत्रकार सम्मेलनमा संघका अध्यक्ष गुरुङले अर्को वर्ष देखि महिला खेलाडिको इभेन्ट्स पनि समावेश गरिने बताए।&nbsp;

टेन के रन हुने

कुपर कोलनीको शानदार शतकले पनि पंजाव किंग्सलाई बुधबार हारबाट जोगाउन सकेन् र सनराइज हैदरावादले इन्डियन प्रिमियर लिग (आईपीएल) २०२६ मा बुधबार ३३ रनको जित निकाल्दै लिग तालिकाको शीर्ष स्थानमा उक्लेको छ । यो नतिजापछि हैदरावादको ११ खेलबाट १४ अंक भएको छ । पंजाव भने १० खेलबाट १३ अंकमा दोस्रो स्थानमा झरेको छ । पंजावको कमजोर फिल्डिङको फाइदा उठाएर हैदरावादले घरेलु मैदानमा पहिले ब्याटिङ गर्दै चार विकेटमा २ सय ३५ रन बनाएको थियो । त्यसमा हेनरिक क्लासेनले ४३ बलमा ६८ रन र इसान किसनले ३२ बलमा ५५ रन बनाएको थियो । जवाफमा पंजावले सात विकेटमा २ सय २ रन मात्र बनाउन सक्यो । उनले नटआउट रहेर ५९ बलमा १ सय ७ रन बनाए र त्यसमा सात चौका र आठ छक्का सामेल थियो ।

पंजावलाई उछिनेर हैदरावाद अगाडि

डिफेन्डिङ च्याम्पियनका रूपमा पेरिस सेन्ट जर्मेन (पीएसजी) ले युरोपेली च्याम्पियन्स लिगको उपाधि रक्षा गर्ने मौका पाएको छ । उसले बुधबार भएको सेमिफाइनल दोस्रो लेगमा बायर्न म्युनिकलाई १–१ को बराबरीमा रोक्दै फाइनल यात्रा निश्चित गरेको हो । अब उपाधिका भिडन्तमा पीएसजीले आर्सनलको चुनौती सामना गर्नेछ । फाइनल मे ३० मा बुडापेस्टमा हुनेछ र त्यसमा पीएसजी नै उपाधिका लागि बलियो प्रत्यासी रहनेछ । पछिल्लो समय लगातार दुई च्याम्यिन्स लिगको उपाधि जित्ने टिम रियल म्याड्रिड रहेको छ । यस्तो उपलब्धी उसले सन् १९९० मा हात पारेको थियो । यसपल्ट म्युनिकमा एलिनाज एरेनामा भएको खेलमा पीएसजीले ओसमन डेम्बेलेको गोलले अग्रता लिएको थियो । खेलको अन्त्यतिर बायर्नका लागि ह्यारी केनले बराबरी गोल फर्काए, तर यसले फाइनल पुग्ने समीकरणमा केही फरक पारेन् ।

Nepalsports

⚽ Upcoming Matches

🎖 Recent Matches

📰 Recent News

Nepalsports