साफ च्याम्पियनसिप २०२६ ढाकामा हुने, आगामी नोभेम्बर आयोजना हुने

दक्षिण एसियाली फुटबलको सर्वोच्च प्रतियोगिता 'साफ च्याम्पियनसिप २०२६' को मिति र आयोजना स्थलको टुङ्गो लागेको छ। प्रतियोगिता बंगलादेशको ढाकामा आगामी नोभेम्बर ४ देखि १७ (२०२६) सम्म सञ्चालन हुनेछ।

दक्षिण एसियाली फुटबल महासंघ (साफ) का सबै सदस्य राष्ट्रहरूले सहभागिता जनाउने अपेक्षा गरिएको यो प्रतियोगिता यस क्षेत्रकै सबैभन्दा प्रतिष्ठित र प्रतिक्षित खेलकुद मानिन्छ।

प्रतियोगिताको तयारी स्वरूप जुलाई २५ मा ढाकामा आधिकारिक लोगो सार्वजनिक गरिनेछ भने अगस्ट १ मा भुटानको थिम्पुमा 'ड्र' (तालिका) सार्वजनिक गर्ने कार्यक्रम तय गरिएको छ।

"साफ च्याम्पियनसिप २०२६ को मिति र आयोजक स्थल घोषणा गर्न पाउँदा हामी अत्यन्तै उत्साहित छौँ। यो प्रतियोगिताले वर्षौँदेखि यस क्षेत्रका फुटबल प्रशंसकहरूका लागि अनगिन्ती अविस्मरणीय क्षणहरू सिर्जना गरेको छ," साफका महासचिव पुरुषोत्तम कट्टेलले भने।

महासचिव कट्टेलले थपे, "फिफा विश्वकप २०२६ भर्खरै सकिएको सन्दर्भमा दक्षिण एसियाभरका फुटबल प्रेमीहरूका लागि यो समाचार निकै उत्साहजनक छ। बंगलादेशमा फुटबलप्रतिको बढ्दो क्रेजलाई ध्यानमा राख्दा त्यहाँ प्रतियोगिता हुनु झन् विशेष छ। बंगलादेशले खेलाडी र समर्थकहरूका लागि ऐतिहासिक र भव्य आयोजना गर्नेमा हामी विश्वस्त छौँ।"

आगामी हप्ता तथा महिनाहरूमा प्रतियोगितासँग सम्बन्धित विभिन्न गतिविधि र जानकारीहरू निरन्तर सार्वजनिक गरिने साफले जनाएको छ।

सन् २०२६ मा आयोजना हुने यो प्रतियोगिता साफ च्याम्पियनसिपको १५औँ संस्करण हो। सन् २०१८ पछि पहिलोपटक साफ च्याम्पियनसिप बंगलादेश फर्किन लागेकाले पनि यसपटकको प्रतियोगितालाई विशेष चासोका साथ हेरिएको छ।