काठमाडौं। आइसीसी विश्वकप लिग–२ अन्तर्गत त्रिकोणात्मक एकदिवसीय शृङ्खलामा नेपालले आज (मंगलबार) स्कटल्यान्डसँग प्रतिस्पर्धा गर्दैछ।

कीर्तिपुरस्थित त्रिवि क्रिकेट रंगशालामा हुने खेल बिहान ९ः३० बजे सुरु हुनेछ। शृङ्खलामा नेपाल, स्कटल्यान्ड र अमेरिका सहभागी छन्।

आठ राष्ट्र सहभागी लिग–२ अंकतालिकामा ३४ अंकसहित स्कटल्यान्ड दोस्रो स्थानमा रहेको छ भने १८ अंकसहित नेपाल पुछारबाट दोस्रो स्थानमा छ।

नेपाल र स्कटल्यान्डबीच हालसम्म १० एकदिवसीय अन्तर्राष्ट्रिय खेल भएका छन्। तीमध्ये नेपालले ५ खेल जितेको छ भने स्कटल्यान्ड ४ खेलमा विजयी भएको छ। एक खेल वर्षाका कारण रद्द भएको थियो।

पछिल्ला पाँच भेटमा नेपालले ३ खेल आफ्नो पक्षमा पार्दा स्कटल्यान्डले १ खेल जितेको छ। एक खेल भने वर्षाका कारण पूरा हुन सकेको थिएन।