काठमाडौं। प्रधानमन्त्री कप एकदिवसीय राष्ट्रिय पुरुष क्रिकेट प्रतियोगिताअन्तर्गत त्रिभुवन आर्मी क्लबले नेपाल पुलिस क्लबविरुद्ध उत्कृष्ट प्रदर्शन गर्दै २२ रनले जित दर्ता गरेको छ।

४७ ओभरको खेलमा आर्मीले बसिर अहमदको शतकीय इनिङ्समा ८ विकेट गुमाएर २४३ रनको प्रतिस्पर्धात्मक योगफल खडा गरेको थियो। जवाफी ब्याटिङमा उत्रिएको पुलिस क्लब ४५।३ ओभरमा २२१ रनमै समेटियो।

२२४ रनको लक्ष्य पछ्याएको पुलिसको सुरुआत खराब रह्यो। पहिलो बलमै विकेट गुमाएको टोलीका लागि राशिद खानले ६० रन बनाउँदै केही संघर्ष गरे। शंकर राणाले ४६ रन जोड्दा आरिफ शेखले ३८ रन बनाए।

तर, आर्मीका बलरहरूले नियमित अन्तरालमा विकेट झार्दै खेल आफ्नो नियन्त्रणमा राखे। नरेन साउदले उत्कृष्ट बलिङ गर्दै ३ विकेट लिए भने आकाश चन्दले २ विकेट हात पारे। शाहब आलम, बसिर अहमद, कुशल मल्ल र पवन कार्कीले समान १–१ विकेट लिए।

मध्यक्रममा विकेट गुमाउँदै गएको पुलिस अन्ततः लक्ष्यभन्दा २२ रन टाढा रहँदै अलआउट भयो। 

त्यसअघि पहिले ब्याटिङ गरेको आर्मीका लागि बसिर अहमदले ८६ बलमा ८ चौका र २ छक्कासहित शानदार १०० रन बनाए। भीम शर्कीले ६२ रनको महत्वपूर्ण योगदान दिँदा दुवैबीचको साझेदारीले टोलीलाई मजबुत स्थितिमा पुर्‍याएको थियो। नरेन साउद २१ रनमा अविजित रहे।

पुलिसका लागि सर्वन यादवले ३ विकेट लिए भने सागर ढकाल र राशिद खानले समान २–२ विकेट झारे। ललित राजवंशीले १ विकेट लिए।