लखनउ सुपर जायन्ट्सले बिहीबार इन्डियन प्रिमियर लिग (आईपीएल) २०२६ मा कोलकाता नाइटराइडर्सलाई अन्तिम बलमा तीन विकेटले पराजित गरेको छ । मुकुल चौधरीले २७ बलमा ५४ रन बनाएर नटआउट रहेपछि लखनउले सात विकेट गुमाएर जितका लागि आवश्यक १ सय ८२ रन बनाएको हो ।

मुकुलले दुई चौका र सात छक्का प्रहार गरे । उनकै शानदार प्रदर्शनले लखनउ जितसम्म पुगेको हो । यस्तै आयुष बडोनीले ३४ बलमा ५४ रन बनाए । लखनउको यो दोस्रो जित हो र यससँगै उसको तीन खेलबाट चार अंक भएको छ । कोलकाता भने चार खेलबाट एकै अंकमा सीमित छ ।

इडेन गार्डेनमा कोलकाताले पहिले ब्याटिङ गर्दै चार विकेटमा १ सय ८१ रन बनाएको थियो । त्यसमा कप्तान अजिन्के रहानेले ४१ र अंगकृश रघुवंशीले ४५ रन बनाए ।