काठमाडौं। अखिल नेपाल फुटबल संघ (एन्फा) ले पहिलो पटक आयोजना गरेको एन्फा वुमन्स च्याम्पियनसिपको उपाधिका लागि आज दुई विभागीय शक्ति आमनेसामने हुँदैछन्। उदयपुरको गाईघाटस्थित थरुहट रंगशालामा दिउँसो ३ बजेदेखि सुरु हुने फाइनल खेलमा त्रिभुवन आर्मी क्लब र एपीएफ क्लब बीच कडा प्रतिस्पर्धा हुने अपेक्षा गरिएको छ।&nbsp; सेमिफाइनलमा आर्मीले नेपाल पुलिस क्लब लाई १–० ले पराजित गर्दै फाइनल यात्रा तय गरेको थियो भने एपीएफले संकटा फुटबल क्लब माथि ३–० को सानदार जित निकाल्दै उपाधि नजिक पुगेको हो। दुवै टोली लयमा रहेकाले खेल प्रतिस्पर्धात्मक हुने आँकलन गरिएको छ। यस खेलका विजेताले ७ लाख ५० हजार रुपैयाँ नगद पुरस्कार हात पार्नेछन् भने उपविजेताले ५ लाख रुपैयाँ प्राप्त गर्नेछन्। नकआउट आधारमा सञ्चालन गरिएको यस प्रतियोगितामा तीन विभागीय टोलीसहित कुल १० टोलीको सहभागिता रहेको थियो।

एन्फा वुमन्स च्याम्पियनिसप: उपाधिका लागि आर्मी र एपीएफ भिड्दै

टी २० विश्वकप २०२६ आज शनिबारदेखि सुपर एट चरणमा प्रवेश गर्दैछ । अस्ट्रेलियाले शुक्रबार राति ओमानमाथि प्राप्त गरेको नौ विकेटको जितसँगै प्रतियोगिताको लिग चरणका खेल समाप्त भएका हुन् । दोस्रो चरणको पहिलो खेलमा आज पाकिस्तान र न्युजिल्यान्ड कोलम्बोमा भिड्दै छन् । यो सुपर एटको ग्रुप टुको खेल हुनेछ । यो समूहमा इंग्ल्यान्ड र श्रीलंका पनि रहेका छन् । यो समूहका सबै खेल श्रीलंकामा हुनेछन् । अर्को ग्रुप वानमा भारत, दक्षिण अफ्रिका, वेस्ट इन्डिज र जिम्बावे रहेका छन् । सुपर एटका लिग खेल टुंगिएपछि प्रत्येक समूहको शीर्ष दुई टिमले सेमिफाइनल यात्रा तय गर्नेछ । प्रारम्भिक चरणको समाप्तीमा प्रतियोगिताबाटै बाहिरिने सबैभन्दा ठूलो टिम पूर्व च्याम्पियन अस्ट्रेलिया रहेको छ । टी २० विश्वकपको इतिहासमा अस्ट्रेलिया दोस्रो चरण पुग्न नसकेको यो दोस्रो पल्ट मात्रै हो ।

आजदेखि सुपर एटका खेल

गोर्का गुरुजेटाले खेल सकिन एक मिनेट अगाडि गरेको गोलको मदतले एथलेटिको बिलबाओले शुक्रबार स्पेनी ला लिगामा एल्चेलाई २–१ ले पराजित गरेको छ । यो जितपछि बिलबाओको २५ खेलबाट ३४ अंक भएको छ र आठौं स्थानमा कायम रहेको छ । खेलको ६४ औं मिनेटमा गुरुजेटाले गोल गर्दै बिलबाओलाई अग्रता दिलाए । त्यसपछि एल्चेका लागि आन्द्रे सिल्भाले पेनाल्टीबाट बराबरी गोल फर्काए । यस्तोमा गुरुजेटाले ८९ औं मिनेटमा पेनाल्टीबाट निर्णायक गोल गरेका हुन् । यो जितले बिलबाओको अर्को सिजन युरोपमा खेल्ने सम्भावना कायम रह्यो । बिलबाओको अगाडि पाँचौंदेखि सातौं स्थानमा रियल बेटिसको ४१, इस्पनयोलको ३५ र सेल्टा भिगोको ३४ अंक रहेको छ ।

एल्चेमाथि बिलबाओ विजयी

काठमाडौं । २०८२ साल फागुन ७ गते विहीबार हिमालयन डुओ चेस प्रतियोगिताको दोस्रो संस्करण शनिबार हुने भएको छ । भक्तपुरस्थित रिडर्स हव, कौशलटारमा हुने एक दिने प्रतियोगिता ‘बगहाउस फम्र्याट’ मा सञ्चालन गरिनेछ । आयोजक हिमालयन चेस एकेडेमीका अनुसार प्रत्येक टिममा दुई खेलाडी हुनेछन्, जसमा कम्तीमा एक खेलाडी अनरेटेड हुनुपर्नेछ । दुवै खेलाडी फिडे रेटेड राखेर टिम बनाउन पाइने छैन । तर, दुवै खेलाडी अनरेटेड भने हुनसक्नेछ । प्रतियोगिता स्वीस प्रणालीको आधारमा पाँच राउन्ड खेलाइनेछ । र, प्रत्येक राउन्ड पाँच मिनेटको हुनेछ । टिम निर्माणमा परिवारका सदस्य, साथी, स्कुलका विद्यार्थी, छिमेकीलाई संलग्न गर्नुपर्ने बताइएको छ । कुल १५ हजार रुपिया पुरस्कारको हिमालयन डुओमा उपाधि जित्ने टिमले ट्रफी, मेडलसँगै नगद सात हजार पाउनेछ । उपविजेताले पाँच हजार र तेस्रो हुने टिमले तीन हजार हात पार्नेछन् । गत वर्ष आयोजित हिमालयन डुओको पहिलो संस्करणमा सुजन काफ्ले र सविन खतिवडाको टिम नाइटमेर कजिन्स च्याम्पियन भएको थियो । अनमोल राई र प्रवीर केसीको गोथ नाइट्स उपविजेता भएको थियो भने लियोन महर्जन र शुभ तुल्स्यानको टिम नाइट्स ग्याम्बिट तेस्रो स्थानमा रहेको थियो । एकेडेमीको थापाथलीस्थित आफ्नै हलमा आयोजित प्रतियोगितामा १७ टिम सहभािग थिए । एकेडेमी भक्तपुर शाखा रहेको योङ लर्नस् (रिडर्स हवसँगै रहेको) मा दोस्रो संस्करण आयोजना गर्न लागिएको हो । २०८० साल चैत १ गते औपचारिक उद्घाटनसँगै व्यवस्थित रुपमा सञ्चालित हिमालयन चेस एकेडेमीले आयोजना गर्न लागेको १३ औं प्रतियोगिता पनि हो– हिमालयन डुओको दोस्रो संस्करण । उसले यसअघि ब्लिट्ज, र्यापिड, क्लासिकल चेस र पजल सोल्भिङ कन्टेस्ट गरी १२ प्रतियोगिता सफलतापूर्वक आयोजना गरिसकेको छ ।

हिमालयन डुओ चेसको दोस्रो संस्करण शनिबार हुने

नटिंघम फरेस्टले बिहीबार युरोपा लिग प्ले अफ पहिलो लेगमा फेनाबाचेलाई ३–० ले हराएको छ र यो नयाँ प्रशिक्षकका रूपमा भिक्टर परेरा आएयता हात पारेको विजयी सुरुआत रह्यो । यो सिजनको चौथो प्रशिक्षक परेराले गत आइतबार मात्रै प्रिमियर लिगमा रेलिगेसनबाट बच्न संघर्षरत फरेस्टसँग १८ महिनाको अनुबन्ध गरेका थिए । फरेस्टको जितमा मरिलो, इगोर जेसस र मोर्गन गिब्स ह्वाइटले गोल गरे । प्रशिक्षकका रूपमा मार्टिन ओ‘नेल भाग्यमानी रहेनन् । उनको हजारौं खेलमा सेल्टिक भने स्टुटगार्टको हातबाट ४–१ ले पराजित रह्यो । अन्य खेलमा रेड स्टार बेलग्रेडले लिललाई १–०, बोलोग्नाले ब्रानलाई १–०, जेन्कले डायनामो जागरेभलाई ३–१, लुडोगोरेट्स रेजगार्डले फेरेन्कभारेसलाई २–१ र सेल्टा भिगोले पीएसओकेलाई २–१ ले हरायो । भिक्टोरिया र प्लाजेन र प्यानाथिनाइकोजले २–२ को बराबरी खेले ।

नयाँ प्रशिक्षक आएयता फरेस्ट विजयी

काठमाडौं। विभागीय टोली एपीएफ क्लब एन्फा वुमन्स च्याम्पियनसिपको फाइनलमा प्रवेश गरेको छ। उदयपुरको गाईघाटस्थित थरुहट रंगशालामा बिहीबार सम्पन्न अन्तिम सेमिफाइनलमा एपीएफले संकटा फुटबल क्लबलाई ३–० ले पराजित गर्दै उपाधि नजिक पुगेको हो। एपीएफको जितमा रश्मी कुमारी घिसिङ, कप्तान अनिता केसी र गीता रानाले समान एक–एक गोल गरे। पहिलो हाफमै रश्मी र अनिताको गोलबाट २–० को सुरक्षित अग्रता बनाएको एपीएफले दोस्रो हाफमा गीता रानाको गोलसँगै जित सुनिश्चित गर्‍यो। अब शनिबार हुने फाइनलमा एपीएफले विभागीय प्रतिद्वन्द्वी त्रिभुवन आर्मी क्लब सँग उपाधिका लागि प्रतिस्पर्धा गर्नेछ। आर्मीले पहिलो सेमिफाइनलमा नेपाल पुलिस क्लब लाई १–० ले हराउँदै फाइनल यात्रा तय गरेको हो।

संकटालाई हराउँदै एपीएफ फाइनलमा

न्युकासल युनाइटेडले युरोपेली च्याम्पियन्स लिग नकआउट चरणको प्ले अफ पहिलो लेगमा बुधबार अजरबैजानको कोरोबागलाई ६–१ ले पराजित गरेको छ र प्रतियोगिताको अन्तिम १६ मा प्रवेशको सम्भावनालाई लगभग निश्चित पारेको छ ।&nbsp; यो जितका नायक रहे, एन्थोनी गोर्डन । उनले चार गोल गरे । अन्य खेलमा भने बोडो/गिल्म्टले भने इटालीको सिरी ए को शीर्षमा रहेको इन्टर मिलानलाई ३–१ ले स्तब्ध पार्‍यो । गत सिजन फाइनल खेलेको इन्टरका लागि यो ठूलो धक्का रहेको छ । यस्तै अन्य खेलमा क्लब ब्रुग र एटलेटिको म्याड्रिडले&nbsp;३–३ कोबराबरी खेले भन् बायर लेभरकुजन भने ओलम्पियाकोजमाथि २–० को जित दर्ता गर्न सफल रह्यो ।&nbsp;

न्युकासलको जितमा गोर्डन नायक

आर्सनलले इंग्लिस प्रिमियर लिगमा बुधबार लिग तालिकाको पुछारमा रहेको उल्भ्स निराशाजनक २–२ को बराबरी खेलेको छ र यसले उसको लिग जित्ने अभियानमा बुधबार ठूलो धक्का लागेको छ ।&nbsp; गत साता पनि ब्रेन्टफोर्डसँग बराबरी खेलेको आर्सनल ५८ अंकमा शीर्ष स्थानमा त छ्, तर यो दोस्रो स्थानमा रहेको म्यानचेस्टर सिटीसँग ५ अंकको दूरी मात्र हो । सिटीले एक खेल कम खेलेको छ र अब आसर्नलमाथि दबाब सिर्जना गर्न सक्नेछ ।&nbsp; बुकायो साका र पिएरो हिनकापिएको गोलले आर्सनलले दुई गोलको अग्रता लिएको थियो । ह्युगो बेनोले उल्भ्सका लागि एक गोल फर्काएपछि रिकार्डो कालाफिओरीले इन्ज्युरी समयमा आत्मघाती गोल गरे र आर्सनले जितबाट वञ्चित रह्यो ।&nbsp;

उल्भ्ससँग आर्सनलको बराबरी

गाईघाट। एन्फा महिला च्याम्पियनसिपअन्तर्गत दोस्रो सेमिफाइनलमा विभागीय टोली एपीएफ क्लब र संकटा फुटबल क्लब आज प्रतिस्पर्धा गर्दै छन्। उदयपुरको गाईघाटस्थित थरुहट रंगशालामा हुने यो निर्णायक खेल दिउँसो ३:३० बजेबाट सुरु हुनेछ। दुवै टोली उपाधि नजिक पुग्ने लक्ष्यका साथ मैदान उत्रिनेछन्। क्वाटरफाइनलमा एपीएफले आरएस पोखरालाई १९–० ले पराजित गर्दै अन्तिम चारमा स्थान सुरक्षित गरेको थियो भने संकटाले न्यू रोड टिम (एनआरटी) लाई &nbsp;४–१ हराउँदै सेमिफाइनल यात्रा तय गरेको हो। आजको खेलको विजेताले फाइनलमा अर्को विभागीय टोली त्रिभुवन आर्मी क्लब सँग शनिबार प्रतिस्पर्धा गर्नेछ। आर्मीले पहिलो सेमिफाइनलमा नेपाल पुलिस क्लब लाई १–० ले स्तब्ध पार्दै उपाधि नजिक पुगेको थियो।

एन्फा महिला च्याम्पियनसिप: फाइनल प्रवेशका लागि एपीएफ र संकटा भिड्दै

गाईघाट। त्रिभुवन आर्मी क्लब एन्फा वुमन्स च्याम्पियनसिपको फाइनलमा प्रवेश गरेको छ। उदयपुरको गाईघाटस्थित थरुहट रंगशालामा बुधबार सम्पन्न पहिलो सेमिफाइनलको विभागीय डर्बीमा आर्मीले नेपाल पुलिस क्लब लाई १–० गोलअन्तरले पराजित गर्दै उपाधि नजिक पुगेको हो। प्रतिस्पर्धात्मक खेलमा आर्मीका लागि बिमला चौधरीले गरेको एक मात्र गोल नै निर्णायक बन्यो। पहिलो हाफमै गरिएको उक्त गोल जोगाउँदै आर्मीले पुलिसको चुनौतीलाई सफलतापूर्वक रोक्यो। जितसँगै आर्मीले अब उपाधिका लागि दोस्रो सेमिफाइनलको विजेतासँग प्रतिस्पर्धा गर्नेछ। दोस्रो सेमिफाइनलमा एपीएफ फुटबल क्लब र संकटा फुटबल क्लब भिड्दै छन्। फाइनल खेल शनिबार हुनेछ।

पुलिसलाई पराजित गर्दै त्रिभुवन आर्मी क्लब फाइनलमा

गाईघाट। एन्फा वुमन्स च्याम्पियनिसप अन्तर्गत पहिलो सेमिफाइनलमा विभागीय डर्बी हुने भएको छ। फाइनल प्रवेशका लागि दुई बलिया टोली नेपाल पुलिस क्लब र त्रिभुवन आर्मी क्लब आमनेसामने हुँदैछन्। उदयपुरको गाईघाटस्थित थरुहट रंगशालामा हुने खेल दिउँसो ३:३० बजेबाट सुरु हुनेछ। यस खेलको विजेताले दोस्रो सेमिफाइनलअन्तर्गत एपीएफ र संकटाबीच हुने खेलको विजेतासँग उपाधिका लागि प्रतिस्पर्धा गर्नेछ। क्वाटरफाइनलमा पुलिसले रियाल एफसीलाई १०–० को फराकिलो अन्तरले पराजित गरेको थियो भने आर्मीले एनआरटीविरुद्ध ६–१ को पुनरागमन जित निकाल्दै सेमिफाइनलमा स्थान बनाएको हो। आगामी ९ गतेसम्म सञ्चालन हुने प्रतियोगिताको विजेताले ७ लाख ५० हजार रुपैयाँ नगद पुरस्कार प्राप्त गर्ने आयोजक एन्फाले जनाएको छ।

पुलिस र आर्मी फाइनल प्रवेशका लागि भिड्दै

भिनिसियस जुनियरले गरेको निर्णायक गोलको मदतले रियल म्याड्रिडले मंगलबार युरोपेली च्याम्पियन्स लिग प्ले अफ पहिलो लेगमा बेनफिकालाई १–० ले हराएको छ । जोसे मोउरिन्होको बेनफिकामाथि यो रियलका बदला पनि रह्यो । खेलको ५० औं मिनेटमा भिनिसियसले गोल गरे र पछि आफूमाथि रंगभेदी व्यवहार गरेको आरोप पनि लगाए । पेरिस सेन्ट जर्मेन (पीएसजी) ले भने दुई गोलले पछाडि रहेको स्थितिाट मोनाकोमाथि ३–२ को पुर्नआमगन जित रत्न सफल रह्यो । त्यसमा डिसाएर डोउले ६७ औं मिनेटमा निर्णायक गोल गरे । अन्य खेलमा बोरुसिया डर्टमुन्डले एटलान्टालाई २–० ले हरायो भने युभेन्ट्स अविश्वसनीय ढंगले गालातासारेविरुद्ध ५–२ ले पराजित रह्यो ।

भिनिसियसको गोलमा रियल विजयी

काठमाडौं। उपकप्तान दिपेन्द्र सिंह एैरीको शानदार अर्धशतलमा नेपालले आइसीसी वेन्स टी(२० विश्वकपमा १२ वर्षपछि पहिलो जित हात पारेको छ । समुहको आफ्नो अन्तिम खेलमा नेपालले आज स्कटल्यान्डलाई ७ विकेटले पराजित गरेको हो । स्कटल्यान्डले दिएको १७१ रनको लक्ष्य नेपालले ४ बल बाँकी हुदा तीन विकेटको क्षतीमा पुरा गर्यो । आसिफ सेख र कुशल भुर्तेलले पहिलो विकेटका लागि ७४ रनको साझेदारी गरेका थिए । भुर्तेलले ४३ र आसिफले ३३ रन जोडे । दीपेन्द्र सिंह ऐरीले आक्रमक ब्याटिङ गर्दै अविजीत ५० रनको योगदान गरे ।&nbsp; त्यसअघि टस हारेर पहिले ब्याटिङ थालेको स्टल्यान्डले २० ओभरमा ७ विकेट गुमाएर १७० रन बनाएको थिय। सोमपाल कामीले ३ विकेट लिए ।

दिपेन्द्रको अर्धशतकमा नेपाल ७ विकेटले विजयी

काठमाडौं। संकटा फुटबल क्लब एन्फा राष्ट्रिय महिला फुटबल च्याम्पियनसिपको सेमिफाइनलमा प्रवेश गरेको छ। उदयपुरको गाईघाटस्थित थरुहट रंगशालामा मंगलबार सम्पन्न अन्तिम क्वाटरफाइनलमा चर्च ब्वाइज युनाइटेड लाई ४–१ ले पराजित गर्दै संकटा अन्तिम चारमा पुगेको हो। संकटाको जितमा होजे मुकाम्बेले दुई गोल गरिन् भने सुक्रिया मिया र पुर्णिमा राईले समान एक–एक गोल थपे। चर्च ब्वाइजका लागि वर्षा ओलीले एक गोल फर्काइन्, तर त्यो सान्त्वनामा सीमित रह्यो। पहिलो हाफ १–१ को बराबरीमा टुंगिएको खेलमा दोस्रो हाफमा संकटाले आक्रामक खेल प्रदर्शन गर्दै थप तीन गोल गर्न सफल भयो। जितसँगै संकटाले सेमिफाइनलमा विभागीय टोली एपीएफ क्लब सँग प्रतिस्पर्धा गर्नेछ।

चर्च ब्वाइजलाई हराउँदै संकटा सेमिफाइनलमा

काठमाडौं। आईसीसी पुरुष टी–२० विश्वकप अन्तर्गत समूह ‘सी’ को आफ्नो अन्तिम खेलमा नेपाल आज स्कटल्यान्डसँग प्रतिस्पर्धा गर्दैछ। मुम्बईस्थित वानखेडे रंगशालामा नेपाली समयअनुसार राति ७:४५ बजे सुरु हुने यस खेलमा नेपालले सुपर आठमा पुग्ने सम्भावना गुमाइसकेको छ। समूहका तीनै खेलमा पराजय बेहोरेपछि नेपालका लागि यो खेल प्रतिष्ठाको रुपमा महत्त्वपूर्ण छ। त्यसैगरी, समान खेलबाट एक जित र दुई हार बेहोरेको स्कटल्यान्ड दोस्रो जित दर्ता गर्दै समूहमा स्थिति सुधार्ने लक्ष्यमा रहेको छ।&nbsp; पहिलाे खेलमा इंङ्ग्लयान्डसँग ४ रनले हारेकाे नेपाल दाेस्राे खेलमा इटालीसँग १० तथा तेस्राे खेलमा वेस्ट इन्डिजसँग ९ विकेटले पराजित भएकाे थियाे। त्यसैले स्कटल्यान्डलाई हराउँदै प्रतियाेगितामा सान्त्वना जितका साथ घर फर्किन चहान्छ।&nbsp;

नेपालले आज स्कटल्यान्डसँग भिड्दै

काठमाडौं। थाइल्याण्डको तेर्दथाई क्रिकेट मैदानमा जारी एसीसी महिला एसिया कप राइजिङ स्टार्स २०२६ अन्तर्गत समूह ‘ए’ को आफ्नो अन्तिम खेलमा नेपाल भारत ‘ए’सँग ७ विकेटले पराजित भएको छ। योसँगै नेपालले समूह चरणका सबै खेलमा हार बेहोर्दै प्रतियोगिताबाट बाहिरिएको छ। प्रतियोगितामा अपेक्षित प्रदर्शन गर्न नसक्दा नेपालका लागि यात्रा निराशाजनक बन्यो। पहिले ब्याटिङ गरेको नेपाल १८ ओभरमा ७८ रनमै समेटियो। सुरुआतदेखि नै दबाबमा परेको नेपालले नियमित अन्तरालमा विकेट गुमायो र प्रतिस्पर्धात्मक लक्ष्य तयार गर्न सकेन। ७९ रनको सामान्य लक्ष्य पछ्याएको भारत ‘ए’ले ७.५ ओभरमै ३ विकेट गुमाएर ८२ रन बनाउँदै सहज जित हात पार्‍यो। भारत ‘ए’का लागि वृन्दा दिनेश १८ बलमा ३९ रन बनाउँदै अविजित रहिन्। उनले ९ चौका प्रहार गर्दै आक्रामक इनिङ्स खेलिन्। तेजल हसबनिसले १८ तथा अनुश्का शर्माले १० रनको योगदान दिइन्। नेपालका तर्फबाट मनीषा उपाध्याय, अनु कडायत र सिता राना मगरले समान १–१ विकेट लिए पनि सानो लक्ष्य र कमजोर ब्याटिङ प्रदर्शनका कारण टोलीलाई जित दिलाउन पर्याप्त भएन।

भारत ‘ए’सँग पराजित हुँदै नेपालको यात्रा समाप्त

काठमाडौं। एन्फा महिला च्याम्पियनसिप अन्तर्गत अन्तिम क्वाटरफाइनलमा संकटा फुटबल क्लब र चर्च ब्वाइज युनाइटेडबीच प्रतिस्पर्धा हुँदैछ। उदयपुरको गाईघाटस्थित थरुहट रंगशाला मा दिउँसो ३:३० बजे सुरु हुने यस खेलको विजेताले सेमिफाइनलमा विभागीय टोली एपीएफ क्लब सँग प्रतिस्पर्धा गर्नेछ। चर्च ब्वाइजले प्रि–क्वाटरफाइनलमा छहारी युवा क्लबलाई १–० ले पराजित गर्दै अन्तिम आठमा स्थान बनाएको थियो। यता संकटाले भने बाइ पाउँदै सिधै क्वाटरफाइनलमा प्रवेश गरेको हो। आगामी ९ गतेसम्म सञ्चालन हुने प्रतियोगिताको विजेताले ७ लाख ५० हजार रुपैयाँ नगद पुरस्कार प्राप्त गर्ने आयोजक एन्फाले जनाएको छ। सेमिफाइनल यात्रा सुनिश्चित गर्न दुवै टोली उच्च मनोबलका साथ मैदान उत्रने अपेक्षा गरिएको छ।

सेमिफाइनल प्रवेशका लागि संकटा र चर्च ब्वाइज भिड्दै

बार्सिलोनाले स्पेनी ला लिगामा सोमबार जिरोनाको हातबाट स्तब्धपूर्ण २–१ को हार बेहोरेको छ र यो उसका लागि उपाधि होडमा ठूलो धक्का रहेको छ । हारले बार्सिलोना ५८ अंकमै सीमित रह्यो र दोस्रँे स्थानमा कायम रह्यो । रियल म्याड्रिड २४ खेलबाट ६० अंकसहित शीर्ष स्थानमा छ । गत साता पनि कोपा डेल रेको पहिलो लेग सेमिफाइनलमा बार्सिलोना एटलेटिको म्याड्रिडको हातबाट नराम्रोस“ग पराजित भएको थियो । पउ चुबरीको गोले बार्सिलोनाले अग्रता लिएयता जिरोनाका लागि थोमस लेमारले ६२ र फ्रान बेल्ट्रानले खेलको अन्त्यतिर ८६ औं मिनेटमा गोल फर्काए ।

हारले बार्सिलोना दोस्रोमै

काठमाडौं । २०८२ साल फागुन ४ गते सोमबार नेपाल कबड्डी लिग (एनकेएल) को दोस्रो सिजन २०८३ साल जेठ २२ गते (५ जुन, २०२६) देखि त्रिपुरेश्वरस्थित राखेप कभर्डहलमा हुने भएको छ । म्यारियट होटलमा सोमबार आयोजित कार्यक्रममार्फत् एनकेएल आयोजक एस्ट्रोनिक्स म्योनजेमन्टले दोस्रो संस्करणको मिति घोषणा गरेको हो । एस्ट्रोनिक्स म्योनजेमन्टका प्रमुख अमितकुमार बेगानीले भने, ‘गत वर्ष पहिलो संस्करण कल्पनाभन्दा पनि राम्रो भयो । यसले नेपाली कबड्डीमा व्यवसायिकताको सुरुआत गरेको छ । अब दोस्रो सिजनलाई त्योभन्दा राम्रो र उत्कृष्ट ढंगले सञ्चालन गर्ने प्रतिबद्धता व्यक्त गर्न चाहन्छु ।’ उनले थपे, ‘दोस्रो सिजनको लागि ५ सय १२ नेपाली खेलाडी र १५ देशका १ सय बढी बिदेशी खेलाडीले नाम दर्ता गरेका छन्, जुन संख्या गत वर्षभन्दा करिब दोब्बर हो र यसले दोस्रो सिजन भव्य हुने संकेत गरेको छ ।’ प्रमुख बेगानीले प्रो कबड्डी लिगका अनुभवी भारतीय खेलाडीहरूसँगै इरान, कोरिया, पोल्यान्डलगायतका उत्कृष्ट खेलाडी एनकेएल खेल्न नेपाल आउन तयार रहेको पनि बताए । एस्ट्रोनिक्स म्योनजेमन्टका प्रमुख कार्यकारी अधिकृत (सीईओ) विकास अग्रवालले एनकेएल १० करोड बजेटमा सञ्चालन हुने जानकारी दिए । कार्यक्रममा नेपाल कबड्डी संघका अध्यक्ष तुलसी थापा, महासचिव अरविन्द कुमार झा, र्यापर भियोमा पनि उपस्थित थिए । एस्ट्रोनिक्स म्योनजेमन्टले एनकेएल सिजन २ को ब्रोडकास्ट पार्टनरको रुपमा कान्तिपुर म्याक्स टीभी एचडीसँग सम्झौता पनि गरेको छ । सम्झौता पत्रमा एस्ट्रोनिक्सका सीईओ अग्रवाल र कान्तिपुर टेलिभिजनका चिफ मार्केटिङ अफिसर (सीएमओ) अनुपम अधिकारीले हस्ताक्षर गरे । सम्झौताअनुसार एनकेएल सिजन २ का खेलहरू कान्तिपुर म्याक्स टीभी एचडीबाट प्रत्यक्ष प्रसारण गरिनेछ । पहिलो सिजन ६ सहरका ६ टिम विराटनगर ब्यान्डिट्स, जनकपुर नाइट्स, काठमाडौं माभरिक्स, पोखरा लेकर्स, हिमालयन रेइडर्स (बुटवल) र धनगढी वाइल्डक्याट्सले प्रतिस्पर्धा गरेका थिए । फाइनलमा काठमाडौंमाथि ४३–४१ को जित रच्दै जनकपुर एनकेएल च्याम्पियन भएको थियो । एस्ट्रोनिक्स म्योनजेमन्ट कबड्डीलाई ग्रासरुटबाटै विकास गर्ने प्रयासमा एनकेएल नेक्स्टजेन इन्टर स्कुल कबड्डी च्याम्पियनसिप पनि सुरु गरेको छ ।

एनकेएल दोस्रो सिजन जेठमा हुने

४ फाल्गुण, ललितपुर।&nbsp;ललितपुरको महालक्ष्मी मन्दिर प्राङ्गणमा सम्पन्न तलकमोहन श्रेष्ठ स्मृति अन्तर विद्यालय चेस प्रतियोगिताको उपाधि महालक्ष्मी स्पोर्ट्स एकेडेमीका जेनिस घिसिङले जितेका छन् ।&nbsp; निकै प्रतिस्पर्धात्मक फाइनल खेलमा जेनिसले भ्याली पब्लिक स्कूलका प्रतिक ढुंगेल विरुद्ध पर्पेन्च्युअल ड्र गर्दै शून्य दशमलव पाँच अंकको अग्रतामा विजेता बन्न सफल भएका छन्। आज चलेको अन्तिम खेलमा ७.५ अंक जोडेर कालो गोटी वाट खेल आरम्भ गरेका जेनिसले थ्रि फोल्ट रिपिटरशन गर्दै ७ अंकमा खेल्दै गरेका प्रतिक विरुद्ध फोर्स बराबरी गर्न वाध्य बनाएका थिए।&nbsp; यस सँगै जेनिसले एकल ८ अंक बनाएर शीर्ष स्थानमा खेल अन्त्य गर्दै नगद पुरस्कार रु. ६ हजार, आकर्षक ट्रफी, गोल्ड मेडल तथा प्रमाणपत्र प्राप्त गरेका छन्। भ्याली पब्लिक स्कुलका खेलाडी प्रतीक ढुंगेलले ७.५ अंक जोडेर द्वितीय स्थानमा खेल अन्त्य गरेका छन्। प्रतिस्पर्धामा उत्कृष्ट खेल प्रदर्शन गरेका ढुंगेलले नगद पुरस्कार रु. ४ हजार, सिल्भर मेडल तथा प्रमाणपत्र प्राप्त गरेका छन्। समान ७.५ अंक जोडेर टाइब्रेकको आधारमा महालक्ष्मी चेस एकेडेमीका सौगात घिमिरे तृतीय स्थानमा रहन सफल भएका छन्। उनले नगद पुरस्कार ३ हजार, ब्रञ्ज मेडल तथा प्रमाणपत्र हात पारेका छन्। भ्याली पब्लिक स्कुलका सुविज्ञ दाहाल प्रोग्रेसिभ प्वाइन्टका आधारमा चौथो, भ्याली कै इश्रान राज श्रेष्ठ पाँचौं, वेष्ट विङ्ग स्कूलका प्रसन्न महर्जन समान ७ अंक सहित छैठौं स्थानमा रहे। यस्तै महालक्ष्मी चेस एकेडेमिका आरभलाल श्रेष्ठ, अनन्त इङ्गलिस स्कूलका साहिल बस्नेत, माउण्ट ओलिभ स्कूलका सन्दिप श्रेष्ठ तथा भ्याली पब्लिक स्कुलका इशान राज श्रेष्ठ समान ६.५ अंक हासिल गर्दै क्रमशः दशौं स्थानमा रहँदै नगद पुरस्कार बाँडेका छन्। यसैगरी छात्रा तर्फ ७ अंक जोडेर फ्युचर स्टार्स एकेडेमिका शीर्ष १७३५ रेटेड खेलाडी ग्लोसि श्रेष्ठ प्रथम भइन्। आर्श्री आचार्य ६ अंक बनाइ द्वितीय, बालकुञ्ज इङ्लिस स्कूलका इन्सु ओलि ५.५ अंक तृतीय, श्रृंगेरि स्कूलका ईशा घिमिरे ५ अंक चौथो तथा महालक्ष्मी एकेडेमीका शुभश्री श्रेष्ठ पाँचौं स्थानमा रहँदै नगद पुरस्कार प्राप्त गरिन्। महालक्ष्मी चेस एकेडेमीले आयोजना गरेको दुई दिने अन्तर विद्यालय बुद्धिचाल प्रतियोगितामा विधागत तर्फ युवा ८ वर्षमा महालक्ष्मी स्पोर्ट्स एकेडेमीका आदित्य न्यौपाने, युवा १० वर्षमा जिनियस आईबी स्कूलका अभियान राई, नमुना इङ्लिस सेकेन्डरी स्कूलका अश्विन श्रेष्ठ र बालकुञ्ज इङ्लिस स्कूलका इसान ओली उत्कृष्ट भए। युवा १२ वर्ष मुनि महालक्ष्मीका रियाज चौलागाईं, नेपाल डनबस्को स्कूलका अमुल्य राज श्रेष्ठ र नमुना इङ्लिस स्कूलका बोतल राई उत्कृष्ट तिनमा रहन सफल भएका छन्। तलक मोहन श्रेष्ठ स्मृति महालक्ष्मीनगर अन्तर स्कूल बुद्धिचाल प्रतियोगितामा जम्मा ११० विद्यार्थी खेलाडीले कूल ३३ हजार नगद पुरस्कार, ट्रफी, मेडल तथा प्रमाणपत्रका लागि १५ मिनेट १० सेकेन्ड इन्क्रिजमेन्ट समय नियन्त्रण प्रणाली अन्तर्गत प्रतिस्पर्धामा सहभागी भएको थियो। प्रतियोगिता सम्पन्न भए पश्चात् नेपाल बुद्धिचाल महासंघका कोषाध्यक्ष ताराबहादुर रानाभाटले विजयी खेलाडीहरुलाई पुरस्कृत गरे। कार्यक्रममा ललितपुर जिल्ला बुद्धिचाल संघका अध्यक्ष बिक्रम श्रेष्ठ, संयोजक अशोक मोहन श्रेष्ठ, प्रमुख निर्णायक हरिकृष्ण श्रेष्ठ, भ्याली पब्लिक स्कुलका प्रशिक्षक एफए सोराज ताम्राकार, परिवार हरि मोहन श्रेष्ठ लगायतको उपस्थिति रहेको थियो।

Nepalsports

एल्चेमाथि बिलबाओ विजयी

📰 Recent News

Nepalsports