क्रोएसियाले विश्वकप २०२६ मा शुक्रबार राति आफ्नो स्थान सुरक्षित गरेको छ । यसका लागि उसले युरोपेली छनोटमा फारो आयरल्यान्डलाई ३–१ ले हरायो । फारोले जेजा डेविडको गोलले अप्रत्यासित अग्रता लिएपछि क्रोएसियाका लागि जोस्को ग्रारिडोल, पिटर मुसा र निकोला भ्लासिचले गोल गरे ।

सन् २०१८ विश्वकप उप–विजेतालाई अब समूह ‘एल’ मा कसैले उछिन्न सक्ने छैन् । यसै समूहका मोन्टेनेग्रोले जिब्राल्टरलाई ३–१ ले हरायो । यस्तै नेदरल्यान्ड्स पनि छनोटको नजिक पुगेको छ । समूह ‘जी’ मा पोल्यान्डले नेदरल्यान्ड्सलाई १–१ को बराबरीमा रोकेको हो ।

जर्मनीले आफ्नो छनोटका लागि अन्तिम खेल कुर्नु पर्नेछ । निक वाल्टेमोडको दुई गोलका मदतले जर्मनीले लक्जेम्बर्गलाई २–० ले हरायो । जर्मनीको समूह ‘ए’ अर्को खेलमा स्लोभाकियाले उत्तरी आयरल्यान्डलाई १–० ले पराजित गर्‍यो ।

अन्य खेलमा फ्रान्सले युक्रेनलाई ४–०, आयरल्यान्डले पोर्चुगललाई २–०, माल्टाले फिनल्यान्डलाई १–०, इटालीले मोल्डोभालाई २–०, इंग्ल्यान्डले सर्बियालाई २–० र अल्बानियाले एन्डोरालाई १–० ले हरायो ।