अखिल नेपाल फुटबल संघ (एन्फा) मा चाँडै चुनावको माग गर्दै केही प्रमुख केन्द्रीय सदस्यले सोमबार पत्रकार सम्मेलनको आयोजना गरेका छन् । उनीहरूको माग हो, एन्फा अध्यक्ष पंजकविक्रम नेम्वाङ र महासचिव किरण राईले काम गर्न सकेनन्, त्यसैले उनीहरूले राजीनामा दिनु पर्छ । पत्रकार सम्मेलन गर्ने पदाधिकारी वरिष्ठ उपाध्यक्ष वीरबहादुर खड्का, उपाध्यक्ष विराटजंग शाही तथा सदस्यद्वय रविन चन्द र रुपेश अधिकारी रहेका छन् । उनीहरूको आरोप हो, एन्फा संवेदनशिल घटनामा उदासिनता छ, सरोकारवालाको वेवास्ता गर्छ, अनि लिग संचालनमा उदासिनता छ। यस्तै एन्फा अन्तर्राष्ट्रिय खेल संचालनमा असफल भएको छ, उसका गतिविधि अपारदर्शी छन् र खेलाडीलाई प्रोत्साहनमा कमी भएको छ । वरिष्ठ उपाध्यक्ष खड्काले भने, ‘वर्तमान अवस्थामा हामी अध्यक्ष नेम्वाङ तथा महासचिव राईलाई के विनम्र अनुरोध छ भने नेपाली फुटबललाई थप दुर्घटनाबाट जोगाउन तपाईहरूले समयमै मार्ग प्रशस्त गर्नु होला ।’ वर्तमान एन्फा कार्यसमितिको एक वर्ष कार्यकाल मात्रै बाँकी छ । आइतबार मात्रै केही फुटबल समर्थकले एन्फा कम्प्लेकस सातदोबाटोमा विरोध प्रदर्शन गरेका थिए । यस्तै त्यही दिन सहिद स्मारक लिग ‘ए’ डिभिजनका क्लब र एन्फाबीच पनि वार्ता स्थगित भएको थियो ।

एन्फा पदाधिकारीकै माग, चाँडै चुनाव

डब्लुटीटी युथ कन्टेन्डर प्रतियोगितामा सहभागी खेलाडीसहित नेपाली टेबलटेनिस टोलीलाई एनआरएनए वेस्टर्न अष्ट्रेलियाले सम्मान गरेको छ । अक्टोबर ८ देखि ११ तारिखसम्म अष्ट्रेलियाको पर्थमा भएको प्रतियोगितामा सहभागी ३ खेलाडी, प्रशिक्षक र टिम व्यवस्थापकसहित ५ जना सम्मानित भएका हुन् । सम्मानित हुने खेलाडीमा आर्यन शाही, प्राज्ना महर्जन र सुरम्या शाक्य, प्रशिक्षकमा राकेश महर्जन तथा टोली व्यवस्थापकमा अखिल नेपाल टेबलटेनिस संघका कोषाध्यक्ष ज्याकी महर्जन रहेका छन् । उनीहरुलाई एनआरएनए वेस्टर्न अष्ट्रेलियाका स्टेट को–ओर्डिनेटर हरिवंश सन्जेल, एनआरएनए वेस्टर्न अष्ट्रेलियाका अध्यक्ष नवीन भण्डारी, नेपाली एसोसिएसन अफ वेस्टर्न अष्ट्रेलियाका पूर्व अध्यक्ष आङ दावा शेर्पा र टेबलटेनिसका पूर्व नेपाल च्याम्पियन अजय सुवालले एक कार्यक्रमबीच सम्मान गरे । नेपाली टोली पर्थबाट अक्टोबर १४ देखि १८ तारिखसम्म हुने टेबलटेनिस प्रशिक्षण शिविरमा सहभागी हुन थाइल्यान्ड जाने छ ।

एनआरएनए वेस्टर्न अष्ट्रेलियाद्वारा नेपाली खेलाडी सम्मानित

काठमाडौं। आईसीसी टी–२० विश्वकप एसिया र इस्ट एसिया प्यासिफिक छनोटको सुपर सिक्समा आज नेपाल र कतार प्रतिस्पर्धा गर्दैछ। ओमानमा जारी खेलमा अंकबिहीन रहेको कतारविरुद्ध जित निकाल्दै नेपाल विश्वकप यात्रा तय गर्ने लक्ष्यमा छ। यसअघि आइतबार सम्पन्न खेलमा समूह ‘बी’को समूह विजेता नेपालले समूह ‘ए’को विजेता यूएईलाई एक रनले हराउँदै चार अंक जोडिसकेको छ। नेपाल र कतारको खेल सोमबार राति ८ः४५ बजे ओमानमा सुरु हुनेछ। सुपर सिक्समा यूएईलाई हराइसकेको नेपालले कतारसँगै ओमान र सामाओसँग प्रतिस्पर्धा गर्दैछ। नेपालले आगामी बुधबार ओमानसँग प्रतिस्पर्धा गर्नेछ। सुपर सिक्सको अन्तिम खेलमा नेपालले सामाओसँग शुक्रबार अर्थात् असोज ३१ गते प्रतिस्पर्धा गर्नेछ।

सुपर सिक्समा नेपाल र कतार भिड्दै

मोहम्मद कुडोसको निर्णायक गोलको मदतले घानाले अफ्रिकी विश्वकप छनोटमा कोमोरोसलाई १–० ले हराएको छ र यससँगै आगामी विश्वकपका लागि छनोट भएको छ । घाना विश्वकपमा अफ्रिकाबाट छनोट हुने पाँचौं तथा समग्रमा २१ औं देश हो । अफ्रिकाबाट अहिलेसम्म ट्युनिसिया, मोरक्को, इजिप्ट र अल्जेरिया पनि आगामी विश्वकपका छनोट भइसकेका छन् । आक्रामा भएको खेलमा टोटनहमका कुडोसले ४७ औं मिनेटमा गोल गरे र यो नै जितका लागि पर्याप्त रह्यो । छनोटको समूह ‘आई’ मा प्राप्त यस जितपछि घानाले दोस्रोमा रहेको माडागास्करमाथि छ अंकको निर्णायक अग्रता हात पारेको छ । माडागास्कर आफै भने अर्को खेलमा मालीसँग ४–१ ले पराजित रह्यो ।

अफ्रिकाबाट घाना पनि विश्वकपमा

मार्टिन एगनारासनले खेल सकिन नौ मिनेट अगाडि गरेको निर्णायक गोलको मदतले फारो आइल्यान्डले आइतबार युरोपेली विश्वकप छनोटमा चेक गणतन्त्रमाथि स्तब्धपूर्ण&nbsp;२–१ को&nbsp;जित रचेको छ ।&nbsp; टोरसभोलरमा भएको खेलमा फारोले हानस सोरेसनको गोलले ६७ औं मिनेटमा अग्रता लिएको थियो । त्यसपछि एडम काराबेचले ७८ औं मिनेटमा चेकका लागि बराबरी गोल फर्काए ।&nbsp; खेल बराबरीतर्फ अग्रसर भएको बेला एगनारासनले विजयी गोल गरे र यस जितपछि समूह ‘एल’ बाट फारोको विश्वकपमा छनोट हुने झिनो सम्भावना कायम रह्यो ।&nbsp; आइतबारका अन्य खेलमा डेनमार्कले ग्रिसलाई&nbsp;३–१, पोल्यान्डले लिथुवानियालाई २–०, रोमानियाले अस्ट्रियालाई १–० र क्रोएसियाले जिब्राल्टरलाई ३–० ले पराजित गरेको छ ।&nbsp;

फारोको स्तब्धपूर्ण जितमा एगनारसन नायक

पाकिस्तानले दक्षिण अफ्रिकाविरुद्ध आइतबारदेखि लहोरमा सुरु भएको पहिलो टेस्टको पहिलो दिन ब्याटबाट ठोस प्रदर्शन गरेको छ । बलियो सुरुआत लिने क्रममा पाकिस्तानले पहिलो दिनको खेल समाप्त हुँदा पाँच विकेट गुमाएर ३ सय १३ रन बनाएको छ । उसका लागि त्यसमा मोहम्मद रिजवान ६२ र सल्मान आगा ६२ रन बनाएर नटआउट छन् । उनीहरूले छैटौं विकेटका लागि १ सय १४ रनको साझेदारी गरिसकेका छन् । त्यस अगाडि टस जितेर पहिले ब्याटिङको निर्णय गरेको पाकिस्तानका लागि ओपनर इमान उल हकले सर्वाधिक ९३ रन बनाए । यस्तै कप्तान सान मसुदले ७६ रनको योगदान गरे ।

दक्षिण अफ्रिकाविरुद्ध पाकिस्तान बलियो

नेपाल आईसीसी ट्वान्टी ट्वान्टी विश्वकप एसियन एन्ड इस्ट एसिया प्यासिफिकको सुपर–सिक्सको आइतबारको खेलमा यूएईमाथि एक रनको रोमाञ्चक जित रचेको छ । यो जितपछि नेपालको दुई खेलबाट चार अंक भएको छ र विश्वकप छनोटको नजिक पुगेको छ । &nbsp;ओमानको अल अमिरत स्थित ओमान क्रिकेट स्टेडियममा जितका लागि १ सय ४१ रनको लक्ष्य पाएको यूएईले नौ विकेटमा १ सय ३९ रन मात्र बनाउन सकेको थियो । यूएईका लागि एसिलसन सरफुले सर्वाधिक ५८ रन बनाए । उनले ४० बलको आक्रामक इनिङ्समा तीन चौका र पाँच छक्का प्रहार गरे । ध्रुव परासरले इनिङ्सको अन्त्यतिर १८ बलमा ३२ रन बनाएपछि खेल रोमाञ्चक मोडमा पुगेको थियो । यूएईलाई जितका लागि अन्तिम ओभरमा १० रन चाहिएको थियो र त्यसमा दीपेन्द्रसिंह ऐरीले उत्कृष्ट बलिङ गर्दै नेपालको जित निश्चित गरे । यस अगाडि नेपालले टस जितेर पहिले ब्याटिङको निर्णय गरेको थियो र यसक्रममा छ विकेट गुमाएर १ सय ४० रन बनएको थियो । नेपालका लागि ओपनर आसिफ सेखले सर्वाधिक ५१ रनको योगदान गरे । उनले ४७ बलको सामना गरेर चार चौका र एक छक्का प्रहार गरे । यस्तै अर्का ओपनर कुशल भुर्तेलले २६ बलमा २८ रन बनाए । उनीहरूले पहिलो विकेटका लागि ५६ रनको साझेदारी गरे । त्यसपछि यूएई खेलमा फर्केको थियो । उसको धारिलो बलिङका अगाडि नेपालले खुलेर रन बनाउन सकेन् र अपेक्षित स्कोर खडा गर्न सकेन् ।

यूएईमाथि नेपालको एक रनको रोमाञ्चक जित

फलो–अन गर्न बाध्य वेस्ट इन्डिज भारतविरुद्धको दोस्रो तथा अन्तिम टेस्टको तेस्रो दिन आइतबार ९७ रनले पछाडि रहेको छ । दिनको खेल समाप्त हुँदा पाहुना टिमले दुई विकेट गुमाएर १ सय ७३ रन बनाएको छ । वेस्ट इन्डिजका लागि केही उत्कृष्ट प्रदर्शन गर्ने क्रममा साइ होप ६६ र जोन क्याम्बेल ८७ रन बनाएर खेलिरहेका छन् । उनीहरूले तेस्रो विकेटका लागि १ सय ३८ रनको नटआउट साझेदारी गरिसकेका छन् । यसअघि वेस्ट इन्डिज आफ्नो पहिलो इनिङ्समा २ सय ४८ रन बनाएर अलआउट भएको थियो । त्यसमा एलिक एथानजेले ४१ र होपले ३६ रन बनाए । दुई टेस्टको सिरिजमा भारत १–० ले अगाडि छ ।

वेस्ट इन्डिज अझै ९७ रनले पछाडि

<div>लिभरपुल लेजेन्ड स्टेफन जेरार्ड कम्तीमा अहिलेका लागि रेन्जर्स नजाने भएका छन् । नत्र स्कटिस प्रिमियर लिग क्लब रेन्जर्सले उनलाई प्रशिक्षक बन्न प्रस्ताव राखेको थियो । यसअघि पनि उनी रेन्जर्सका प्रशिक्षक थिए, सन् २०१८ देखि २०२१ सम्म । </div><div>&nbsp;</div><div>त्यसबीच उनले एकपल्ट लिग उपाधि पनि जिते । अहिले क्लब आफैमा समस्यामा छ, खराव लयका कारण । गत साता मात्रै रेन्जर्सले आफ्ना प्रशिक्षक रसेल मार्टिनलाई वर्खास्त गरेको थियो । यी प्रशिक्षक क्लबमा जम्मा जम्मी १७ खेल मात्रै टिके र यसबीच समर्थकबीच खलनायक जस्तै रहे ।</div><div> </div><div>अब क्लब नयाँ प्रशिक्षकको खोजीमा छ, भेटाउन भने सकिरहेको छैन् । जेरार्डले यसपल्ट रेन्जर्स जान नचाहनुको कारण हो, उनकै शब्दमा, गलत समय । उनी कुनै न कुनै बेला पछि रेन्जर्स फर्किन चाहन्छन्, तर अहिलेका लागि भने होइन् । जेरार्डको अबको योजना के छ, त्यो पनि प्रस्ट भने छैन्।</div><div> </div><div>रेन्जर्स छाडेयता उनी सुरुमा एस्टन भिल्ला गए । त्यसपछि साउदी अरेबियाको अल–इतिफाक पनि सम्हाले । तर दुवै अवसरमा सफल रहेनन् । कुनै समय उनी लिभरपुल आउने विश्वास पनि छ, मर्सिसाइड क्लबका समर्थकबीच । सायद जेरार्ड अर्को कुनै उपयुक्त प्रस्तावको प्रतीक्षामा छन् ।</div>

जेरार्ड अहिलेका लागि रेन्जर्स नजाने

इर्लिङ हालान्डले गरेको एक अर्को ह्याट्रिकको मदतले नर्वेले युरोपेली विश्वकप छनोटमा शनिबार इजरायललाई ५–० ले हराएको छ । हालान्डले २७, ६३ र ७२ औं मिनेटमा गोल गरे । उनले क्लब र आफ्नो देशका लागि लगातार दसौं खेलमा गोल गरेका छन् । यससँगै उनको अन्तर्राष्ट्रिय गोल संख्या कीर्तिमान ५१ पुगेको छ । समूह ‘आई’ मा प्राप्त यस जितपछि नर्वे सन् १९९८ यता पहिलो पटक विश्वकपमा छनोट हुने संघारमा पुगेको छ । यही समूहको अर्को खेलमा टर्कीले बुल्गेरियालाई ६–१ ले हरायो । स्पेनले छनोटमा आफ्नो शतप्रतिशत सुरुआतलाई शनिबार कायम राख्ने क्रममा जर्जियालाई २–० ले हराएको छ । त्यसमा येरेमी पिनोले पहिलो हाफ र मिखेल ओयारजबालले दोस्रो हाफमा गोल गरे । यो जितपछि स्पेनको तीन खेलबाट नौ अंक भएको छ र समूह ‘ई’ को शीर्षमा छ । यस्तै समूह ‘एफ’ मा पोचुृगलले उत्तरी आयरल्यान्डमाथि १–० को जित हात पार्‍यो र त्यसमा रुबेन नेभासले खेलको अन्त्यतिर एक मात्र गोल गरे । यो समूहमा हंगेरी दोस्रो स्थानमा छ र उसले अर्को खेलमा आरमेनियामाथि २–० को जित दर्ता गर्‍यो ।

हालान्डको ह्याट्रिकमा नर्वे विश्वकप छनोट नजिक

वेस्ट इन्डिज र भारतबीचको दोस्रो टेस्टको दोस्रो दिनको खेल शनिबार समाप्त हुँदा पाहुना टिम अझै ३ सय ७८ रनले पछाडि रहेको &nbsp;छ । नयाँ दिल्लीको अरुण जेट्ली स्टेडियममा वेस्ट इन्डिजले आफ्नो पहिलो इनिङ सुरु गर्दै चार विकेटमा १ सय ४० रन बनाएको छ । पाहुना टिमका लागि साइ होप ३१ र टेभिन इमलाच १४ रन बनाएर खेलिरहेका छन् । केही सुधारिएको खेल प्रदर्शन गरेको वेस्ट इन्डिजका लागि एलिक एथान्जले सर्वाधिक ४१ रन बनाएका छन् । त्यस अगाडि भारतले पाँच विकेट गुमाएर ५ सय १८ रनमा आफ्नो पहिलो इनिङ्स समाप्तीको घोषणा गरेको थियो । त्यसमा कप्तान शुभमन गिलले १ सय २९ रन बनाए । यस्तै नितिश कुमारले ४३ र ध्रुव जुरेलले ४४ रन बनाए । अघिल्लो दिन शतक बनाएर नटआउट रहेका ओपनर यशस्वी जयसवाल लामो समय टिक्न सकेनन् । उनी १ सय ७५ रन बनाएर आउट भए ।

वेस्ट इन्डिज ३ सय ७८ रनले पछाडि

काठमाडौँ- केभिआर समीट च्यालेन्ज तेस्रो संस्करणको पहिलो चरणमा पुरुषतर्फ डेनमार्कका डेनियल मोयलर र महिलातर्फ नेदरल्यान्ड्सकी एनी माइ बान पहिलो भएका छन् ।&nbsp; ट्रेलमान्डु नेपालको आयोजनामा शनिबार भएको २१ किलोमिटरको रेसमा पुरुषतर्फको विजेता डेनियलले दुई घन्टा २१ मिनेट ३२ सकेन्ड समय लगाए । नेपालका दिपक मान तामाङ दुई घन्टा ३१ मिनेट २ सकेन्ड समय लगाएर दोस्रो भए । तेस्रो हुने भरत गुरुङले दुई घन्टा ३१ मिनेट ४ सकेन्डमा दौड पुरा गरे । महिलातर्फ एनीले दुई घन्टा ४५ मिनेट समयसहित सबभन्दा चाँडै दौड पुरा गरिन् । अमेरिका÷जर्मनीकी सोन्या मार्टिन (२ः५८ः३० सकेन्ड) दोस्रो र आइसल्यान्डकी सोफी स्टाइनकर (३ः०९ः१३ सकेन्ड) तेस्रो स्थानमा रहे ।

केभिआर समिट च्यालेन्जसमा डेनियर र एनी पहिलो

ओमानमा चलिरहेको २०२५ मेन्स ट्वान्टी ट्वान्टी वर्ल्डकप एसिया–ईएपी रिजिनल फाइनलको शुक्रबार सुपर–सिक्सको समीकरण पूरा भएको छ । नेपालससँगै आयोजक ओमान र यूएई दुई बोनस अंकसहित यो चरणमा प्रवेश गर्न सफल भएका छन् । त्यस्तै कतार, जापान र समाओ पनि सुपर–सिक्स पुगेका छन् । लिग चरणको समाप्तीमा प्रतियोगिताबाट बाहिरिनेमा मलेसिया, कुवेत र पपुवा न्युगिनी रहे । सुपर–सिक्सको समाप्तीमा शीर्ष तीन स्थानमा रहने टिमले अबको विश्वकपका लागि छनोट हुनेछन् । अब नेपालले मंगलबार हुने खेलमा यूएईको सामना गर्नेछ । त्यसपछि कतार, ओमान र समाओविरुद्ध खेल्नेछ ।

‘सुपर–सिक्स’ को समीकरण पूरा

विश्वकपको युरोपेली छनोटमा शुक्रबार राति जर्मनी र फ्रान्सले अपेक्षित सजिलो जित निकालेका छन् । चार पल्टको विश्व च्याम्पियन जर्मनीले दस खेलाडीमा सीमित लक्जेम्बर्गलाई ४–० ले हरायो र त्यसमा कप्तान जोसुआ किम्चीले दुई गोल गरे । यो जितपछि जर्मनी समूह ‘ए’ को शीर्षमा रह्यो । त्यसै समूहमा उत्तरी आयरल्यान्डले स्लोभाकियालाई २–० ले हरायो । फ्रान्सले भने पेरिसमा अजरबैजानलाई ३–० ले पराजित गर्‍यो र त्यसमा केयलिन एमबापले पनि एक गोल गरे । आफ्नो देश र क्लबका लागि लगातार दसौं खेलमा उनले गोल गरेर उत्कृष्ट लय कायम राखेका छन् । समूह ‘डी’ मा फ्रान्स तीन खेलबाट नौ अंकसहित शीर्षमा छ । यसै समूहको अर्को खेलमा युक्रेनले आइसल्यान्डमाथि ५–३ को जित दर्ता गर्‍यो ।

जर्मनी र फ्रान्सको सजिलो जित

काठमाडौं । एएफसी यु–१७ महिला एसिया कप २०२५ को छनोट प्रतियोगितामा भाग लिन नेपाली महिला फुटबल टोलीको बिदाइ गरिएको छ।&nbsp; टोलीलाई शुक्रबार एक विशेष समारोहकाबीच अखिल नेपाल फुटबल संघ (एन्फा) का अध्यक्ष पंकजविक्रम नेम्वाङलगायत पदाधिकारीहरूले बिदाइ गरेका हुन्। एन्फा मुख्यालयमा आयोजित बिदाइ कार्यक्रममा अध्यक्ष नेम्वाङले टोलीलाई शुभकामना व्यक्त गर्दै खेलमैदानमा आफ्नो सम्पूर्ण क्षमताको प्रदर्शन गर्न आग्रह गरे। उनले भने, “हाम्रो युवा खेलाडीहरूले देशको प्रतिनिधित्व गर्दै थाइल्यान्डमा उत्कृष्ट खेल देखाउने विश्वास लिएको छु। यो केवल खेल प्रतियोगिता होइन, देशको गौरव बढाउने अवसर पनि हो।” छनोट प्रतियोगिता अन्तर्गत नेपाल समूह ‘बी’ मा रहेको छ। उक्त समूहमा नेपालसँगै घरेलु टोली थाइल्यान्ड र तुर्केमिनिस्तान रहेका छन्। नेपाली टोलीले पहिलो खेल अक्टोबर १५ मा तुर्केमिनिस्तानविरुद्ध खेलेपछि दोस्रो खेल अक्टोबर १७ मा आयोजक थाइल्यान्डसँग प्रतिस्पर्धा गर्ने तालिका छ। यी दुवै खेल थाइल्यान्डमै हुनेछ।

एएफसी यु–१७ महिला एसिया कप छनोट खेल्न थाइल्यान्ड जाने नेपाली टोलीलाई बिदाइ

ओपनर यशस्वी जयसवालको उत्कृष्ट शतकको मदतले भारत भारतले वेस्ट इन्डिजविरुद्धको दोस्रो टेस्टको पहिलो दिन शुक्रबार बलियो सुरुआत लिएको छ । नयाँ दिल्लीको अरुण जेट्ली स्टेडियममा भारतले दिनको खेल टुंगिदा दुई विकेट गुमाएर ३ सय १८ रन बनाएको छ । टस जितेर पहिले ब्याटिङको निर्णय गरेको भारतका लागि यशस्वीले शानदार १ सय ७३ रन बनाएर नटआउट छन् । उनले २ सय ५३ बलको सामना गरेर २२ चौका प्रहार गरेका छन् । उनलाई क्रिजमा २० रन बनाएका कप्तान शुभमन गिलले साथ दिइरहेका छन् । त्यस अगाडि अर्का ओपनर केएल राहुलले ३८ बनाए । यस्तै साइ सुदर्शनले १२ चौकोको मदतले ८७ रनको योगदान गरे । अब दोस्रो दिन यशस्वी आफ्नो दोहोरो शतक प्रहार गर्न प्रयासरत रहनेछ । दुई टेस्टको सिरिजमा भारत १–० ले अगाडि छ ।

यशस्वीको शानदार शतक

काठमाडौं। टी-२० विश्वकप एसिया ईएपी छनोट अन्तर्गत नेपालले आज जापानसँग खेल्दै छ।&nbsp; खेल ओमानको अल अमेरतस्थित ओमान क्रिकेट एकेडेमी टर्फ-१ मा नेपाली समयअनुसार दिउँसो ४ः१५ बजेदेखि सुरु हुनेछ। दुवै टिम सुपर सिक्स पुगिसकेका छन् त्यसैले आज जितमा प्राप्त हुने अंक सुपर सिक्समा जोडिनेछ। नेपालले आफ्नो पहिलो खेलमा कुवेतलाई ५८ तथा जापानले पनि कुवेतलाई ५ विकेट पराजित गरेको थियो। नेपाल दुई अंकका साथ समूह ‘बी’ को शीर्ष स्थानमा छ।

नेपालले आज जापानसँग खेल्दै

एसियाकप छनोटको बिहीबार भएका खेलमा दक्षिण एसियाली देशमध्ये श्रीलंकाले मात्र जित हात पारेको छ । अब्दुल्ला अल्मुताइरीको नेतृत्वमा रहेको श्रीलंकाले समूह ‘डी’ मा तुर्किमिनिस्तानालई १–० ले हरायो । त्यसमा लियोन परेसाले एक मात्र निर्णायक गोल गरे । श्रीलंकाको तीन खेलबाट छ अंक भएको छ । बलियो तुर्किमिनिस्तान भने समान छ अंकमा शीर्ष स्थानमा छ । थाइल्यान्ड छ अंकमै तेस्रो स्थानमा छ । समूह ‘ए’ मा माल्दिभ्स ताजाकिस्तानको हातबाट २–० ले पराजित रह्यो । लेवनानले समूह ‘बी’ मा भुटानलाई २–० ले पराजित गर्‍यो । बंगलादेश भने समूह ‘सी’ मा हङकङसँग सात गोलको रोमाञ्चक खेलमा ४–३ ले पछाडि पर्‍यो । समूह ‘सी’ मा भारतले सिंगापुरसँग १–१ को बराबरी खेल्यो भने पाकिस्तान र अफगानिस्तानले समूह ‘ई’ मा गोलरहित बराबरीमा चित्त बुझाए । नेपाल समूह ‘एफ’ मा भियतनामसँग ३–१ ले हारेको थियो ।

दक्षिण एसियाली देशमध्ये श्रीलंकाको मात्र जित

युरोपेली विश्वकप छनोटको बिहीबार भएका खेलमा ठूला टिम सबै विजयी भएका छन् । त्यसमध्ये समूह डेनमार्कले बेलारुसलाई ६–० र स्कटल्यान्डले ग्रिसलाई ३–१ ले हरायो । यस्तै नेदरल्यान्ड्सले माल्टालाई ४– र अस्ट्रियाले सान मारिनालाई १०–० ले पराजित गर्‍यो । डेनमार्कले प्राप्त गरेको सजिलो जितमा रसमन होजलन्ड र आन्द्रेस ड्रेयरले दुई दुई गोल गरे । अस्ट्रियाको ठूलो अन्तरको जितमा मार्को आरनाटोभिच एक्लैले चार गोलसहित आफ्नो ह्याट्रिक पूरा गरे । यससँगै उनी अस्ट्रियाका लागि सर्वाधिक गोल गर्ने खेलाडी बनेका छन् । आफ्नो देशका लागि उनको गोल संख्या कीर्तिमान ४५ पुगेको छ ।

ठूला टिम जति सबै विजयी

काठमाडौं। नेपाल एक खेलअगाबै आईसीसी टी–२० विश्वकप एसिया एन्ड इस्ट–एसिया प्यासिफिक छनोटको सुपर सिक्समा प्रवेश गरेको छ। जापानले कुवेतलाई बुधबार ५ विकेटले पराजित गरेसँगै नेपालले सुपर सिक्समा स्थान बनाएको हो।समूह ‘बी’को पहिलो खेलमा नेपालले कुवेतलाई ५८ रनले हराएको थियो। नेपाल नेट रनरेटको आधारमा शीर्ष स्थानमा छ। जापान भने दोस्रो स्थानमा छ। यद्यपि, जापान पनि सुपर सिक्समा प्रवेश गरिसकेको छ। लगातार दुई हार बेहोरेको कुवेत भने समूह चरणबाट बाहिरिएको छ। अब नेपालले समूह चरणको अन्तिम खेल शुक्रबार जापानसँग खेल्नेछ। यही खेलले समूहको विजेता टुंगो लगाउने छ।

Nepalsports

एनआरएनए वेस्टर्न अष्ट्रेलियाद्वारा नेपाली खेलाडी सम्मानित

📰 Recent News

Nepalsports